Grímur Bessason

Grímur Bessason, 1745 til 1748. Hann var fæddur 1719. Sonur Bessa Árnasonar að Hrafnkelsstöðum og konu hans Guðrúnar Þórðardóttur. Varð stúdent frá Skálholtsskóla 1741, síðar djákn að Skriðuklaustri og í þjónustu Þorsteins sýslumanns Sigurðssonar á Víðivöllum, en vígðist að Ofanleiti 1745, en hélt því embætti í aðeins þrjú ár, eða þar til hann fékk Ás í Fellum og síðar Hjaltastaði í Útmannasveit, sem hann hélt til æviloka. Hann var talinn gáfumaður og kennimaður góður þegar hann vildi við hafa og skáldmæltur vel. Kona hans var Oddný Árnadóttir, lögréttumanns á Arnheiðarstöðum og áttu þau tvo syni, sem upp komust. Hann andaðist 1785.