Guðrún Ágústsdóttir (Hörgsholti)
Guðrún Ágústsdóttir frá Hróarsholti í Flóahreppi, húsfreyja í Hörgsholti fæddist 29. janúar 1916 og lést 30. mars 2013 í Hraunbúðum.
Foreldrar hennar voru Ágúst Bjarnason bóndi í Hróarsholti, f. 18. ágúst 1878, d. 27. júní 1928, og kona hans Kristín Bjarnadóttir húsfreyja, f. 8. desember 1877, d. 16. ágúst 1963.
Guðrún var með foreldrum sínum fyrstu 12 ár sín, en faðir hennar lést 1928. Hún var í Hróarsholti með ekkjunni móður sinni og systkinum.
Hún lærði sauma og vann mikið við það og einnig prjón.
Guðrún vann utan heimilis í Ísfélaginu í mörg ár. Þá vann hún mikið að félagsmálum, í Kvenfélaginu Líkn og í Kvenfélagi Landakirkju og Félagi eldri borgara.
Þau Bergur Elías kynntust, er hann var kaupamaður í Hróarsholti.
Þau giftur sig 1937 í Hraungerðiskirkju, eignuðust þrjú börn. Þau bjuggu í fyrstu á Dyrhólum við Hásteinsveg 15b, þá í Hörgsholti við Skólaveg 10 til Goss 1973, bjuggu í eitt ár í Þorlákshöfn, en reistu hús við Dverghamar 15 og bjuggu þar síðan.
Bergur Elías lést 2003. Guðrún flutti í Eyjahraun, íbúð fyrir aldraða 19. sept. 2009 og síðan í júní 2011 í Hraunbúðir.
Guðrún lést 2013.
I. Maður Guðrúnar, (15. maí 1937), var Bergur Elías Guðjónsson útgerðarmaður, verkstjóri, í stjórn Ísfélagsins í mörg ár, f. 10. júní 1913, d. 7. júní 2003.
Börn þeirra:
1. Ágúst Bergsson skipstjóri, f. 19. september 1937. Kona hans Stefanía Guðmundsdóttir.
2. Margrét Klara Bergsdóttir húsfreyja, verslunar- og skrifstofumaður, f. 13. ágúst 1941, d. 22. júní 2011. Maður hennar Birgir Símonarson.
3. Kristín Bergsdóttir húsfreyja, f. 8. desember 1945. Maður hennar Kristmann Karlsson.
Heimildir
- Samantekt: Víglundur Þór Þorsteinsson.
- Íbúaskrá Vestmannaeyja 1972.
- Íslendingabók.is.
- Morgunblaðið 13. apríl 2013. Minning.
- Prestþjónustubækur.
Þessi grein tilheyrir Æviskrám Eyjafólks eftir Víglund Þór Þorsteinsson.