Reynir Guðsteinsson (skólastjóri)

Guðbjörn Reynir Guðsteinsson er fæddur 10. maí 1933, sonur Guðsteins Ingvars Þorbjörnssonar, f. 6. sept. 1910 og Guðrúnar Margrétar Guðmundsdóttur, f. 20. júní 1909. . Reynir lauk landsprófi frá Hlíðardalsskóla í Ölfusi 1953 og Almennu kennara- og söngkennaraprófi frá Kennaraskóla Íslands 1957, BA prófi í uppeldis- og sálarfræði frá Háskóla Íslands 1983, og prófi í Barna- og unglingaráðgjöf frá Kennaraháskólanum í Kaupmannahöfn 1996. Kenndi við Hlíðardalsskóla 1957 til 1958, var skólastjóri Barnaskóla S.D.A. í Reykjavík 1958 til 1962, skólastjóri Barnaskóla S.D.A í Vestmannaeyjum 1962 til 1966 og skólastjóri Barnaskólans í Vestmannaeyjum frá 1966 til 1979 (Var í námsleyfi 1978-79). Var kennari við Snælandsskóla í Kópavogi frá 1979, yfirkennari við þann skóla 1980 og skólastjóri frá 1984. Reynir átti stóran þátt í að skipuleggja skólastarf barnanna á meginlandinu meðan á eldgosinu stóð 1973 og koma skólastarfinu í samt horf að loknu gosi. Reynir fór á eftirlaun haustið 2000, en vann eftir það til ársins 2012 fyrir Skólaskrifstofu Kópavogs við greiningar og ráðgjöf vegna lesblindra barna í grunnskólum Kópavogs.

Reynir var mjög virkur í félagsstarfi í Vestmannaeyjum, í starfi safnaðar aðventista, íþróttahreyfingunni, hjá Alþýðuflokkunum og hjá söngfélögum. Hann var formaður Knattspyrnufélagsins Týs, formaður Samkórs Vestmannaeyja, formaður stjórnar Sjúkrahúss Vestmannaeyja 1966-1978, var formaður barnaverndarnefndar, bæjarfulltrúi 1970 til 1978 og forseti bæjarstjórnar 1977 til 1978. Hann var einnig formaður undirbúningsnefndar fyrir stofnun Framhaldsskóla í Vestmannaeyjum á sínum tíma, var formaður Stjórnar Verkamannabústaða í Vestmananeyjum eftir gosið 1973, og umboðsmaður Brunabótafélags Íslands í Vestmannaeyjum frá 1973-1978. Eftir að hann flutti til „meginlandsins“ var hann m.a. formaður Kennarafélags KSK (Kópavogs, Seltjarnarsness, Kjósarsýslu) um árabil, sat í stjórn Kennarasambands Íslands 1982 til 1984, var í stjórn Rauðakrossdeildar Kópavogs frá 2000 til 2008 og á sama tíma fulltrúi Rauða kross Íslands í stjórn Fjölsmiðjunnar, sem er vinnusetur fyrir ungt fólk.

Reynir varð meðlimur í Karlakór Reykjavíkur 1958 þar til hann flutti til Eytja 1962. Tók svo aftur upp þráðinn, þegar hann fluttist til Reykjavíkur 1978. Hann hefur verið í stjórn kórsins, var formaður ritnefndar að sögu Karlakórs Reykjavíkur „Hraustur menn“ sem kom út á 75 ára afmæli kórsins 2001. Hann er einn af heiðursfélögum Karlakórs Reykjavíkur og starfar þar enn.

Ritstörf: Saga Aðventsafnaðarins í Vestmannaeyjum, „Blik“ 1965, „Fimm daga skólavika“ í ritinu Heimili og skóli 1970, „Skóli í skugga eldgoss“ Háskóli Íslands 1983, „Skólaþroski og námsárangur“ BA-ritgerð, Háskóli Íslands 1983, „Stofnbúnaður skóla“, ásamt Guðjóni Ólafssyni, og ýmsar greinar um uppeldis- skóla- og félagsmál. Þýdd eða frumort ljóð við ýmis lög sem birst hafa m.a. í „Söngvasveigur“ og „Sálmar og lofsöngvar“ - Auk þess þýddir textar á geisladiskum með Karlakór Reykjavíkur og í nótnasafni hans. Út hafa komið eftirtaldar nótnabækur, sem Reynir safnaði efni í og tölvusetti: „Sálmar og ættjarðarlög fyrir karlakór“ Útgef. Karlakór Reykjavíkur 1992, „Árni Hólm, tónsmíðar“ útgefin í Bandaríkjunum 2000, „Söngheimar Salómons Heiðar“ útgefin í Bandaríkjunum 2016.

Reynir var kvæntur Maríu Júlíu Helgadóttur frá Ísafirði og eru börn þeirra: María Björk, f. 28. apríl 1956, Helgi Ingvar, f. 30. des. 1958, Guðmundur Víðir, f. 24. apríl 1967 og Margrét Ósk, f. 9. júní 1972. Þau bjuggu á Illugagötu 71 frá 1965 til goss. Eftir gos bjuggu þau til að byrja með í Barnaskólanum en keyptu síðan Sóleyjargötu 1 og bjuggu þar til ársins 1978 er þau fluttu í Kópavog. Reynir og María skildu 1992. Seinni eiginkona hans frá 1.júní 1998 er Helga Guðmundsdóttir frá Ytri-Njarðvík, fædd 17. apríl 1946. Þau búa í Hafnarfirði.