Kristinn Pálsson (skipstjóri)
Kristinn Pálsson fæddist í Þingholti í Vestmannaeyjum 20. ágúst 1926. Hann lést á Sjúkrahúsi Vestmannaeyja 4. október 2000. Foreldrar hans voru Þórsteina Jóhannsdóttir og Páll Sigurgeir Jónasson.
Á jóladegi árið 1953 kvæntist Kristinn Þóru Magnúsdóttur, hjúkrunarfræðingi frá Tungu í Vestmannaeyjum. Foreldrar hennar voru Halldóra Reyndal og Magnús Bergsson.
Börn Kristins og Þóru eru:
- Magnús Kristinsson, maki Lóa Skarphéðisdóttir.
- Jóna Dóra Kristinsdóttir, maki Björgvin Þorsteinsson.
- Bergur Páll Kristinsson, maki Hulda Karen Róbertsdóttir.
- Birkir Kristinsson, maki Ragnhildur Gísladóttir.
Kristinn lauk hefðbundnu skólanámi í Vestmannaeyjum. Árið 1948 útskrifaðist hann frá Stýrimannaskólanum í Reykjavík. Hann stundaði sjómennsku svo til alla sína starfsævi. Hann hóf eigin útgerð 1948 og gerði út til dauðadags. Berg VE-44 keypti hann 1954 en hann var lengst af skipstjóri á honum og var oftast kallaður Kristinn á Berg.
Kristinn rak lengi útgerðarfyrirtækið Bergur ehf. Síðar stofnaði hann útgerðarfyrirtækið Bergur-Huginn ehf. og var framkvæmdarstjóri þess og síðar stjórnarformaður.
Eftir að Kristinn hætti á sjónum, stjórnaði hann fyrirtækjum sínum en tók jafnframt að sér formennsku í Útvegsbændafélagi Vestmannaeyja, Lífeyrissjóði Vestmannaeyja og var lengi í stjórn Ísfélags Vestmannaeyja.
Heimildir
- Árni Johnsen og Þórleifur Ólafsson. Kristinn á Berg. 2005.