Ritverk Árna Árnasonar/Guðni Hjörtur Johnsen

Guðni Johnsen.

Kynning.
Guðni J. Johnsen útgerðarmaður og kaupmaður frá Frydendal, síðar í Ásbyrgi, fæddist 15. júní 1888 og lést 18. janúar 1921.
Foreldrar hans voru Jóhann Johnsen veitingamaður í Frydendal, f. 9. október 1847, d. 11. maí 1893, sonur Jóhanns Jörgens Johnsen, þá faktors við Garðsverslun, síðar í Hafnarfirði, og kona Jóhanns J. Johnsen Önnu Sigríðar Johnsen Árnadóttur bónda á Oddsstöðum Þórarinssonar.

Kona Guðna var Jóhanna Erlendsdóttir húsfreyja í Ásbyrgi, f. 5. júlí 1888, d. 3. september 1970.

Börn Guðna og Jóhönnu voru:
1. Friðþjófur Ingi Guðnason Johnsen lögfræðingur, f. 21. júlí 1911, d. 20. apríl 1963.
2. Ágústa Sigríður Möller húsfreyja í Reykjavík, f. 26. júní 1913, d. 29. október 2007.
3. Erla Johnsen, f. 3. júlí 1916, d. 11. febrúar 1917.
4. Rögnvaldur Johnsen húsameistari, f. 5. apríl 1920, d. 26. febrúar 2008.

Úr fórum Árna Árnasonar símritara: Bjargveiðimannatal.
Guðni Johnsen var hár maður vexti, vel limaður og þrekinn, en mjög liðlega vaxinn. Hann var dökkhærður, ljós í andliti og fríður vel, kátur, ræðinn og veitull og mjög afhaldinn af öllum, enda mjög vinmargur. Hann var ágæta góður lundaveiðimaður og stundaði það allmikið, t.d. í Elliðaey og Suðurey og gat sér ágætis orðstír, bæði sem veiðimaður og félagi, sigamaður var hann góður.
Lífsstarf Guðna var annars verslunarstörf bæði við Edinborg og sem sjálfstæður kaupmaður.
Um Guðna mætti segja mjög mikið, en rúmið leyfir það ekki. Hann var einn þeirra manna, sem hafa flesta þá kosti að bera, sem bestir eru og var hvers manns hugljúfi, síkátur og blíður við hvern sem var og vildi öllum vel gera. Tel ég hann hiklaust einn af bestu sonum Heimaeyjar.

Guðni J. Johnsen og Jóhanna með börnin Friðþjóf Inga og Ágústu Sigríði.

Úr fórum Árna Árnasonar, efnisyfirlit

---

Heimildir

• Samantekt: Víglundur Þór Þorsteinsson.
• Eyjar og úteyjalíf – Úrval verka Árna Árnasonar símritara frá Grund. Sögufélag Vestmannaeyja í samstarfi við Safnahús Vestmannaeyja 2012.
• Garður.is.
• Hver er maðurinn. Brynleifur Tobíasson. Fagurskinna 1944.
• Manntöl.
• Prestþjónustubækur.
• Saga Vestmannaeyja. Sigfús M. Johnsen. Ísafoldarprentsmiðja 1946.