Úr fórum Árna Árnasonar. Verk annarra/Bitavísur eða skipavísur

Bitavísur.

Það mun hafa verið forn siður að grafa vísur eða vísu

á bitafjölina í þeim skipum, sem gengu til fiskveiða.

Yfirleitt var efni vísunnar bæn til guðs

um farsæld fyrir skip og skipshöfn til lands og sjávar. (Heimaslóð).

Eldri skip í Eyjum.

Lukkureynir

Bitavísa hans var eftir Pál skálda Jónsson.

Höppum stýri á hnísu mýra flóði,

hættumein og slys ei nein ofbjóði

lægis hreini

Lukkureyni,

guð, sá eini góði.

Vestmannaey

Bitavísa hennar var eftir Pál skálda Jónsson.

Vænti ég fleyið Vestmannaey að heiti

vogar – skundi, er líður stund að - reiti

eignar heimi

aflann teymi

upp úr geimi

og heilum heim að fleyti.

Pétursbátur

Bitavísa hans var eftir Pál skálda Jónsson.

Aflakjör í fiskaför

fyrðum vel svo láti,

kjósum fyrstan formann Krist

fyrir Pétursbáti.

Friður

Árblíðu fær Friður

för, gæfu kjör hreppi,

Góðgjarni guð stjórni,

geim lægi, beim vægi,

mild höndin sæld sendi,

sið blessi, geð hressi,

lífs föður lof lýðir

láð virstu í náð Kristi.

Gideon

Milding heiti menn, sem veiti

á mastra dýri

lukku veiti á laxamýri

ljóssins anda kóngur stýri.

Úr fórum Árna Árnasonar, efnisyfirlit