Blik 1937, 3. tbl./Herjólfsdalur

Herjólfsdalur.

Ó, hvar um alla veröld víða

svo vegleg sönghöll finnst,

sem hér í skjóli hárra hlíða

í Herjólfsdalnum innst?

Þar kátir fuglar kvaka

frá klöpp og sjó,

og breiðum vængjum blaka

í bjarga tó.

Hve mjúkt og hlýtt er gólfið græna,

þar glitra blómin smá,

mót blárri hvelfing björgin mæna

svo brött og tignarhá.

Sér dreifa hvítar kindur

um klett og grund.

Hér syngur sær og vindur

og sveinn og sprund.

Hér syngur hver með sínum rómi,

og sólin roðar tjöld,

og dalur fyllist fögrum hljómi

um fagurt sumarkvöld,

og börn með ljúfu lyndi

þar leika sér.

Hvar er að finna yndi,

ef ekki hér?

Sigurbjörn Sveinsson.