Rannveig Ögmundsdóttir (Smiðjunni)

Rannveig Ögmundsdóttir bústýra í Smiðjunni fæddist 12. september 1822 og lést 12. febrúar 1893.
Foreldrar hennar voru Ögmundur Jónsson bóndi víða í Landeyjum, en síðast á Skækli (nú Guðnabakki) í A-Landeyjum, f. 1776 á Lágafelli þar, d. 24. mars 1844 á Skækli, og barnsmóðir hans Ingibjörg Magnúsdóttir, síðar húsfreyja á Skækli, f. 9. janúar 1799, d. 11. janúar 1872.

Hálfbróðir Rannveigar, samfeðra, var Jón Ögmundsson bóndi á Kirkjubæ, f. 7. janúar 1806, d. 6. maí 1840.

Rannveig var með Ögmundi föður sínum og Margréti Ólafsdóttur konu hans í Rimakoti í A-Landeyjum 1835, hjá móður sinni og manni hennar Jóni Árnasyni á Syðri-Úlfsstöðum 1840. Hún var ógift vinnukona á Bergþórshvoli í V-Landeyjum 1845.
Hún eignaðist tvö börn með Atla, var vinnukona á Bergþórshvoli 1850, ógift í Snotru 1855, „hefur fyrir barni sínu“.
Hún fluttist til Eyja 1858, 36 ára, að Kornhól, og var bústýra hjá Helga Jónssyni, sem var ekkill þar.
Rannveig var bústýra í Smiðjunni 1859 og 1860 hjá Guðmundi Péturssyni sjómanni. Hún var vinnukona í Frydendal 1861-1867, en fór þaðan til Vesturlands.
Rannveig var óg. vinnukona á Söndum í Dýrafirði 1870, í Kvígindisdal við Patreksfjörð 1880 og ómagi í Botni í Súgandafirði 1890.
Hún lést 1893.

I. Barnsfaðir að tveim börnum Rannveigar var Atli Jónsson bóndi í Ey í V-Landeyjum, f. 17. september 1813, d. 20. maí 1890.
Börn þeirra:
1. Jón Atlason, f. 1846, d. 1. október 1846.
2. Jón Atlason bóndi í Haga í V-Landeyjum, f. 14. ágúst 1847, d. 20. janúar 1917. Kona hans Katrín Guðmundsdóttir. Barnsmóðir hans Ingibjörg Jónsdóttir.

---

Heimildir

• Samantekt: Víglundur Þór Þorsteinsson.
• Íslendingabók.is.
• Landeyingabók – Austur-Landeyjar. Valgeir Sigurðsson og fleiri. Ritstjóri: Ragnar Böðvarsson. Austur-Landeyjahreppur, Gunnarshólma 1999.
• Magnús Haraldsson.
• Manntöl.
• Prestþjónustubækur.

---

Þessi grein tilheyrir Æviskrám Eyjafólks eftir Víglund Þór Þorsteinsson.

---