Smári P. McCarthy

Smári við Suðurveg 25.

Smári Páll McCarthy fæddist 7. febrúar 1984 í Reykjavík. Foreldrar hans eru Kolbrún Óskarsdóttir og Eugene McCarthy. Smári hefur búið í Búðarfelli við Skólaveg og Faxastíg 1.

Smári flutti ásamt foreldrum til Englands eins árs. Þau fluttu svo til Vestmannaeyja þegar Smári var níu ára gamall og hóf hann nám við Barnaskólann. Fljótlega skipti hann um skóla og fór í Hamarsskóla. Hann lauk grunnskólanámi frá Barnaskólanum og fór til náms í Reykjavík. Þar opnuðust honum möguleikar til að sameina vinnu og eitt helsta áhugamál sitt; tölvur. Vann hann við forritun hjá Þjóðskjalasafninu áður en hann kom aftur til Vestmannaeyja til að klára framhaldsskólanám. Smári útskrifaðist frá Framhaldsskólanum í Vestmannaeyjum árið 2004. Hann fékk sumarvinnu hjá Vestmannaeyjabæ og vann hjá bænum til sumarloka árið 2005. Stundar hann nú nám í stærðfræði við Háskóla Íslands.

Hjá Vestmannaeyjabæ vann hann fyrst um sinn við GPS-mælingar og alls konar tilfallandi verkefni. Ól hann með sér hugarfóstur um að koma á laggirnar menningarsöguvef um Vestmannaeyjar á Wiki-formi. Tekið var vel í þessa hugmynd hjá bænum og fyrr en varði höfðu hann og Frosti Gíslason safnað styrkjum fyrir verkefnið. Vefurinn fór í fulla vinnslu í júní 2005 og fékk Smári í lið með sér hóp peyja sem voru allir af vilja gerðir til að setja þessa hugmynd Smára í framkvæmd. Fékk vefurinn nafnið Heimaslóð og vann hópurinn í honum þetta sumar. Síðan þá hefur vefurinn verið í stöðugri þróun og unnið að honum af öðrum starfsmönnum og íbúum Vestmannaeyja sem og brottfluttum Vestmannaeyingum.