Lúðrasveit Vestmannaeyja

Lúðrasveit Vestmannaeyja undir stjórn Oddgeirs Kristjánssonar.

Rétt eftir aldamótin síðustu vaknaði mikill áhugi á tónlist í Vestmannaeyjum og komu nokkrir ungir menn saman með þá hugmynd að stofna lúðrasveit í Eyjum. Gekk ekki allt áfallalaust í fyrstu þar sem hljóðfæri, sem pöntuð voru að utan, strönduðu með skipi rétt við Færeyjar. Voru þá keypt önnur hljóðfæri en seld bráðlega þegar hin fyrr nefndu komu til Eyja.

Í Hornaflokknum voru sex menn sem kalla má brautryðjendur tónlistar hér í Eyjum:

• Pétur Lárusson - Piccolo
• Lárus Johnsen - Sólótenor
• Árni Árnason - Cornet
• Guðni Johnsen - Althorn
• Páll Ólafsson - ?
• Brynjólfur Sigfússon; stjórnandi - Túba

Naut þessi fyrsta lúðrasveit mikilla vinsælda og spilaði á flestum útisamkomum, svo sem á Þjóðhátíð, og við önnur hátíðleg tækifæri.

Þegar Helgi Helgason, tónskáld, fluttist til Vestmannaeyja árið 1918 hóf sveitin að starfa að nýju. Undir stjórn Helga starfaði lúðrasveitin til ársins 1921. Starfið lagðist síðan aftur niður á árunum 1921 til haustsins 1924, en Auðbjörn Emilsson endurvakti þá lúðrasveitina í annað skiptið. Lúðrasveitin var undir leiðsögn Auðbjörns til sumars 1925, er Hallgrímur Þorsteinsson, frá Reykjavík kom til Eyja og stjórnaði sveitinni næstu þrjú sumur, eða til ársins 1927. Ragnar Benediktsson, frá Mjóafirði, stjórnaði lúðrasveitinni í fjarveru Hallgríms.

Merki Lúðrasveitar Vestmannaeyja.

Árið 1925 byrjuðu þeir Oddgeir Kristjánsson og Hreggviður Jónsson að leika í lúðrasveitinni undir stjórn Hallgríms Þorsteinssonar og störfuðu þar til ársins 1932, en þá hætti sveitin störfum. Það var í þriðja sinn er sveitin lagði upp laupana. Árið 1939 flutti Hreggviður Jónsson aftur til Vestmannaeyja eftir nokkurra ára búsetu í Reykjavík, þar sem hann starfaði með lúðrasveitinni Svaninum. Hófust þeir Hreggviður og Oddgeir þá handa við að endurreisa starf lúðrasveitar í Vestmannaeyjum og hefur sveitin nú starfað óslitið í 65 ár. Oddgeir stjórnaði síðan Lúðrasveit Vestmannaeyja, sem tók upp það nafn við hina þriðju endurreisn, frá árinu 1939 til æviloka, 1966. Hreggviður starfaði við hlið Oddgeirs sem formaður Lúðrasveitar Vestmannaeyjum frá stofnun ásamt því að leika á sousafón (túbu).

Eftir að Oddgeir féll skyndilega frá tók Martin Hunger við sem stjórnandi Lúðrasveitar Vestmannaeyja. Martin starfaði frá aprílmánuði 1966 til ársloka 1969. Þá tók við stjórnartaumunum Björn Sv. Björnsson (sonur Sveins Björnssonar, fyrsta forseta Íslands) og var til janúarmánaðar 1971 er Ellert Karlsson hóf að stjórna sveitinni. Ellert var síðan með lúðrasveitina fram að gosi, í janúar 1973. Þess má geta að Björn Sv. leysti Ellert af á veturna, en hann var þá við tónlistarkennaranám í Reykjavík. Björn Leifsson tók síðan að sér að vera stjórnandi Lúðrasveitar Vestmannaeyja, er hún hóf störf að nýju eftir gosið. Björn starfaði fram á haust 1976 er Stefán Sigurjónsson tók við stjórnartaumunum. Haustið 1977 tók Hjálmar Guðnason við af Stefáni og var með Lúðrasveit Vestmannaeyja fram til ársins 1988. Stefán Sigurjónsson hefur verið stjórnandi lúðrasveitarinnar frá 1988 til dagsins í dag.

Litla lúðrasveitin

Skólalúðrasveitin eða „Litla lúðrasveitin“ er skipuð nemendum Tónlistarskólans í Vestmannaeyjum. Sveitin var formlega stofnuð 22. febrúar 1978. Skólalúðrasveit var fyrst sett á laggirnar í Vestmannaeyjum árið 1956. Var það Oddgeir Kristjánsson sem stóð fyrir því í samráði við Þorstein Víglundsson, skólastjóra Gagnfræðaskólans, sem sá um hljóðfærakaup og hafði sveitin aðstöðu í skólanum. Einnig hefur verið sett á laggirnar tvær aðrar sveitir sem ætlaðar eru yngri nemendum skólans en þær heita "Míni-Lú" og "Pínku-Lú". Stjórnandendur þessara sveita eru Jarl Sigurgeirsson og Eggert Björgvinsson.

Stjórnendur lúðrasveita í Vestmannaeyjum í 100 ár:

Raðað í tímaröð

Stjórnendur	Tímabil	Athugasemd
Brynjólfur Sigfússon	Frá september 1904 til 1916	Ekkert starf frá 1916 til 1918
Helgi Helgason	Frá 1918 til 1921	Ekkert starf frá 1921 til haustsins 1924
Auðbjörn Emilsson	Frá hausti 1924 til 1925
Hallgrímur Þorsteinsson	Frá hausti 1924 til 1927	Ekkert starf frá 1927('32) til 1939
Oddgeir Kristjánsson	Frá 1939 til febrúar 1966
Martin Hunger	Frá apríl 1966 til ársloka 1969
Björn Sv. Sveinsson	Frá apríl 1970 til janúar 1971
Ellert Karlsson	Frá janúar 1971 til 1973	Ekkert eða lítið starf frá gosi til 1974
Björn Leifsson	Frá 1974 til hausts 1976
Stefán Sigurjónsson	Frá hausti 1976 til hausts 1977
Hjálmar Guðnason	Frá hausti 1977 til 1988
Stefán Sigurjónsson	Frá 1988 til dagsins í dag

Raðað eftir árafjölda

• Oddgeir Kristjánsson, stjórnandi L.V. í 27 ár.
• Stefán Sigurjónsson, stjórnandi L.V. í 17 ár.
• Brynjólfur Sigfússon, stjórnandi í 12 ár.
• Hjálmar Guðnason, stjórnandi L.V. í 9 ár.
• Martin Hunger, stjórnandi L.V. í 3 ár.
• Hallgrímur Þorsteinsson, stjórnandi í 3 ár.
• Helgi Helgason, stjórnandi í 3 ár.
• Ellert Karlsson, stjórnandi L.V. í 2 ár.
• Björn Leifsson, stjórnandi L.V. í 2 ár.
• Auðbjörn Emilsson, stjórnandi í 1 ár.
• Björn Sv. Sveinsson, stjórnandi L.V. í 1 ár.

<meta:creator>Skapti Örn Ólafsson</meta:creator>