Ritverk Árna Árnasonar/Sæmundur Ingimundarson (Draumbæ)

Sæmundur Ingimundarson og kona hans Sigríður Guðrún Eyjólfsdóttir.

Kynning.

Sæmundur Ingimundarson bóndi í Draumbæ fæddist 1. september 1870 og lést 22. október 1942.
Foreldrar hans voru Ingimundur Sigurðsson bóndi í Draumbæ, f. 12. september 1835 í Neðri-Dal í Mýrdal, og kona hans, Katrín Þorleifsdóttir, f. 1838 á Tjörnum í Stóradalssókn undir Eyjafjöllum.

Kona Sæmundar var Sigríður Guðrún Eyjólfsdóttir húsfreyja, f. 8. nóvember 1879 í Brautarholtssókn í Kjósarsýslu, d. 28. apríl 1950.
Börn Sæmundar og Sigríðar:
1. Sigrún Karólína, f. 18. apríl 1902, d. 10. apríl 1989.
2. Kristmundur, f. 1. nóvember 1903, d. 21. ágúst 1981.
3. Rósa, f. 26. september 1907, d. 25. október 1984.
4. Katrín, f. 15. desember 1910, d. 30. september 1929.
5. Ásta Þórhildur, f. 27. janúar 1918, d. 4. janúar 1996.
6. Laufey Hulda, f. 29. október 1920, d. 15. september 2002.

Úr fórum Árna Árnasonar símritara:
Bjargveiðimannatal.
Sæmundur var meðalhár vexti, dökkhærður og ekki þrekinn, en samsvaraði sér vel. Hann var fremur daufgerður í daglegri umgengni, en gat þó verið ræðinn og skemmtilegur í sínum hóp.
Hann var vart meðalgóður veiðimaður, en þrautseigur, iðinn og fylginn sér. Sæmundur var góður bóndi og áhugasamur, komst í allgóð efni, þrátt fyrir þungt heimili, og húsaði bæ sinn vel og myndarlega eftir þátíma kröfum. Sjó stundaði hann töluvert, lipur sjómaður og vel látinn af félögum sínum. Bjargferðir stundaði Sæmundur nokkuð mikið, til eggja og fuglaveiða, – fýl – , og reyndist duglegur og áhugasamur við þau störf og hinn liprasti.

Úr fórum Árna Árnasonar, efnisyfirlit

---

Heimildir

• Samantekt: Víglundur Þór Þorsteinsson.
• Eyjar og úteyjalíf – Úrval verka Árna Árnasonar símritara frá Grund. Sögufélag Vestmannaeyja í samstarfi við Safnahús Vestmannaeyja 2012.
• Íslendingabók.is.
• Manntöl.
• Vestur-Skaftfellingar. Björn Magnússon. Leiftur 1970-1973.