Ritverk Árna Árnasonar/Snorri Þórðarson (Steini)

Snorri

Snorri Þórðarson frá Steini fæddist 7. mars 1882 og lést 16. desember 1924, 42 ára að aldri. Hann fórst við Eiðið.

Frekari umfjöllun

Snorri Þórðarson í Steini, fæddist 16. mars 1881 í Steig í Mýrdal og lést 16. desember 1924, drukknaði við Eiðið á leið út í e.s. Gullfoss.
Faðir hans var Þórður bóndi í Steig, f. 15. mars 1850 á Brekkum í Mýrdal, d. 29. júlí 1882 í Steig, Þórðarson bónda á Brekkum, f. 6. janúar 1798 á Brekkum, d. 26. maí 1862 þar, Ólafssonar bónda á Brekkum, f. 1759, d. 19. febrúar 1823 „í útveri suður í Leiru“, Guðmundssonar, og barnsmóður Ólafs, Ingveldar vinnukonu, f. 1763 á Brekkum, Árnadóttur.
Móðir Þórðar í Steig og síðari kona Þórðar Ólafssonar var Ragnhildur húsfreyja, f. 1809 í Holti í Álftaveri, d. 26. apríl 1892 á Brekkum, Gísladóttir bónda í Holti, f. 1768, d. 22. júní 1811, Jónssonar, og konu Gísla, Ingibjargar húsfreyju, f. 1766, d. 23. júní 1811, Vigfúsdóttur.

Móðir Snorra í Steini og kona Þórðar í Steig var Þuríður húsfreyja, f. 25. júlí 1851, d. 11. ágúst 1944 hjá Þórunni dóttur sinni á Setbergi í Eyjum, Ólafsdóttir bónda, síðast í Steig, f. 1812 á Flögu í Skaftártungu, d. 20. mars 1871, drukknaði í Dyrhólahöfn, Þorlákssonar bónda á Ytri-Sólheimum, f. 17. febrúar 1776 á Herjólfsstöðum í Álftaveri, d. 23. september 1839 á Ljótarstöðum í Skaftártungu, Jónssonar, og konu Þorláks, Elínar húsfreyju, f. 1771 í Ytri-Ásum í Skaftártungu, d. 21. september 1844, Loftsdóttur.
Móðir Þuríðar Ólafsdóttur og kona Ólafs Þorlákssonar var Halldóra húsfreyja, f. 15. september 1825 á Búlandi í Skaftártungu, d. 12. október 1917 á Hnausum í Meðallandi, Jónsdóttir bónda á Búlandi, f. 1787 á Búlandi, d. 13. mars 1875, Björnssonar, og konu Jóns Björnssonar, Oddnýjar húsfreyju, f. 2. september 1791 á Þverá á Síðu, d. 6. ágúst 1843 á Búlandi, Runólfsdóttur.

Snorri var 8 ára niðursetningur á Loftsölum í Mýrdal 1890. Hann fluttist til Eyja árið 1899.
1901 var hann vinnumaður í Dölum. Við manntal 1910 var hann „Fuglari“ og leigjandi á Hlíðarenda.
Við manntal 1920 var hann í Steini, kvæntur bátaútgerðarmaður með Þorgerði.

Systkini Snorra í Eyjum voru
1. Guðmundur Þórðarson útgerðarmaður á Akri, f. 7. maí 1878, d. 16. desember 1924, fórst með Snorra bróður sínum við Eiðið.
2. Þórunn Þórðardóttir húsfreyja á Vesturvegi 23, (Setbergi), f. 9. desember 1880, d. 19. maí 1980, kona Unnsteins Sigurðssonar skipasmiðs.

Kona Snorra Þórðarsonar í Steini var Þorgerður Jónsdóttir húsfreyja í Steini, f. 15. nóvember 1880 í Vestra-Fíflholti í Landeyjum, d. 19. júní 1939.
Börn Snorra og Þorgerðar í Steini:
1. Þuríður, f. 3. maí 1913, d. 20. september 2003.
2. Aðalheiður Margrét, f. 29. október 1914.
3. Aðalsteinn Rútur, f. 26. apríl 1918, d. 18. ágúst 2001.

Úr fórum Árna Árnasonar símritara:
Bjargveiðimannatal.
Snorri var lágur að vexti, tæplega meðalmaður, en vel þrekinn og allsterklegur á velli, var áður léttleikamaður mikill, snar og þéttur í átökum og fylginn sér hvívetna. Hann var dagfarsgóður maður, stilltur og gætinn, frekar til baka gagnvart almenningi og virkaði daufur í skapgerð og ómannblendinn, en í félagsskap var hann skemmtilegur og viðræðugóður, en orðvar.
Snorri var allsleipur veiðimaður, en veiddi þó ávallt upp á hægri hönd, gat ekki veitt upp á hina. Sat hann því oft öfugur og virkaði það einkennilega til að sjá. Staði bjó hann nokkra fyrir sig, liggur þar háfurinn beint niður frá honum. Hann var frakkur í fjöllum og alls óhræddur, en fór þó allvarlega þó hratt færi.
Hann var töluvert við veiðar alls konar og þótti góður veiðimaður. Hin síðustu árin veiddi hann í Heimakletti, en var þó að fara í úteyjar. Hann var annars sjómaður og stundaði þess utan hvers konar landvinnu og t.d. mikið við skipaafgreiðslurnar og lést við þau störf við góðan orðstír.

Úr fórum Árna Árnasonar, efnisyfirlit

---

Heimildir

• Samantekt: Víglundur Þór Þorsteinsson.
• Eyjar og úteyjalíf – Úrval verka Árna Árnasonar símritara frá Grund. Sögufélag Vestmannaeyja í samstarfi við Safnahús Vestmannaeyja 2012.
• Íslendingabók.is.
• Manntöl.
• Vestur-Skaftfellingar 1703-1966. Björn Magnússon. Leiftur 1970-1973.

Myndir

• 
•