Blik 1951/Herjólfur Guðjónsson, minning

Efnisyfirlit 1951

HERJÓLFUR GUÐJÓNSSON

Minningarorð

Herjólfur Guðjónsson

Einn af því mæta fólki er fórst með Glitfaxa 31 jan. s.l. var Herjólfur Guðjónsson verkstjóri.
Ég sé sérstaka ástæðu til að ársrit Gagnfræðaskólans geymi nokkur minningarorð um Herjólf, sem var virkur starfskraftur í byggingarnefnd skólans frá því hún fyrst var kosin.
Í því starfi naut Gagnfræðaskólinn velvildar, áhuga og fyrirhyggju þessa valda drengskaparmanns, sem Herjólfur Guðjónsson var. Hann lét að vísu ekki fara mikið fyrir þessum hug sínum til mín og skólans á nefndarfundum, en ég naut því meir áhuga hans, velvildar og ráðhyggju í starfinu sjálfu. Þau ráð reyndust jafnan heilladrjúg og happasæl.
Herjólfur Guðjónsson var traustur maður í hvívetna, verkséður með afbrigðum og skyldurækinn. Hann mátti í engu vamm sitt vita. Hann naut líka mikils trausts, og voru honum falin vandasöm verkefni til úrlausnar, sem hann leysti af hendi með sæmd.
Jafnan er vandfyllt skarð það, er verður, þá slíkir menn falla frá. Atvinnulíf bæjarins hefur mikils misst við fráfall Herjólfs Guðjónssonar, þó að sárastur sé harmur eiginkonu og barna og annarra nákominna ástvina og ættingja, þegar jafn ágætir eiginmenn og heimilisfeður, og tryggir og traustir ættingjar falla frá á bezta aldri.
Ég minnist Herjólfs Guðjónssonar af hlýjum og þakklátum huga.

Þ.Þ.V.