Lea Oddsdóttir

Lea Oddsdóttir ljósmóðir, hjúkrunarforstjóri, f. í Neskaupstað 27. september 1955.

Ætt og uppruni

Foreldrar hennar voru Oddur Alfreð skólastjóri Gagnfræðaskólans og Iðnskólans í Neskaupstað, síðar Víghólaskóla í Kópavogi, en síðast bókasafnsvörður í Eyjum, f. 23. júlí 1911 á Grund í Svínadal í A-Húnavatnssýslu, d. 26. marz 1983 í Eyjum, Sigurjóns bónda á Rútsstöðum í Svínavatnshreppi þar, f. 7. júní 1891 í Brautarholti í Reykjavík, d. 10. september 1989 á Blönduósi, Oddssonar og barnsmóður Sigurjóns, Ingibjargar verkakonu í Þórðarhúsi í Blönduóshreppi og húsfreyju á Vesturá, f. 31. desember 1882 á Blönduósi, d. 10. október 1955, Jósefs bónda á Hamri í Svínavatnshreppi, Jósefssonar bónda í Hlíð í Norðurárdal, Helgasonar. Móðir Leu og kona (13. ágúst 1938) Odds skólastjóra var Magnea Sigríður húsfreyja, matráðskona við barnaskóla í Kópavogi, síðar við Barnaskóla Vestmannaeyja, f. 26. febrúar 1917, d. 1. okt. 2001, Bergvins kennara og verkamanns á Svalbarðseyri við Eyjafjörð, f. 21. júní 1882, d. 11. janúar 1965, Jóhannssonar og konu Bergvins, Sumarrósar húsfreyju, Magnúsar bónda á Efri-Vindheimum á Þelamörk í Eyjafirði, Oddssonar.

Lífsferill

Lea lauk stúdentsprófi við Menntaskólann í Kópavogi 1976, ljósmæðraprófi við Ljósmæðraskóla Íslands 30. september 1978 og hjúkrunarprófi við Nýja hjúkrunarskólann 1986.

Hún var ljósmóðir í Eyjum frá 4. október 1978 til 29. október 1983, þar af deildarljósmóðir frá 1981 og síðan í afleysingum þar 6. júní-10. september 1984. Vann þá á Sjúkrahúsi Keflavíkur frá 1985, deildarljósmóðir þar og einnig í afleysingum.
Til Eyja flutti Lea aftur 1994 og varð hjúkrunarforstjóri á Hraunbúðum, dvalarheimili aldraðra. Hefur unnið á einstöku ljósmæðravöktum á Sjúkrahúsinu.

Barnsfaðir: Ingi Rúnar Eðvarðsson dósent við Háskólann á Akureyri, f. 21. desember 1958.
Barn: Sigurlaug Birna Leudóttir, f. 24. nóvember 1992.
Maki II (fjarbúð): Ragnar Ragnarsson framleiðslustjóri Ísafoldarprentsmiðju, f. 1. marz 1953.

---

Heimildir

• Upphaflega grein skrifaði Víglundur Þór Þorsteinsson.
• Kennaratal á Íslandi. Reykjavík: Útgefandi Prentsmiðjan Oddi H.F., 1958-1988.
• Lea Oddsdóttir.
• Ljósmæður á Íslandi. Reykjavík: Ljósmæðrafélag Íslands, 1984.
• Ættir Austur-Húnvetninga. Reykjavík: Mál og mynd, 1999. Skrá # 580/151/306.