Jóna Kristinsdóttir (ljósmóðir)

Jóna fæddist 21. des. 1895 í Steinakoti á Árskógsströnd í Eyjafirði, lézt 27. okt. 1975 í Reykjavík.
Foreldrar hennar voru Kristinn Anton smiður, bóndi og skipstjóri á Hrafnagili og víðar, síðar á Hamri í Fljótum í Skagafirði, en síðast búsettur á Siglufirði, f. 18. júlí 1866, d. 13. júlí 1942, Ásgríms bónda á Skeiði í Fljótum Ásmundssonar og konu Ásgríms, Guðrúnar Sveinsdóttur frá Minna-Holti þar. Móðir Jónu var Helga Guðrún, f. 4. okt. 1864, d. 5. marz 1952, Baldvins bónda á Hrafnagili Sveinssonar og konu Baldvins, Guðrúnar Gísladóttur frá Haga á Árskógsströnd.
Jóna lauk ljósmæðraprófi við Ljósmæðraskóla Íslands 31. marz 1919, var ljósmóðir í Haganeshreppsumdæmi í Eyjafirði 1919-1921. Eftir það var hún ljósmóðir í Eyjum til 20. ágúst 1949, er hún fluttist til Reykjavíkur. Í Eyjum sinnti hún jafnframt hjúkrun í heimahúsum. Í Reykjavík vann hún á sjúkrahúsinu að Sólheimum 1949-1962.
Hún var einn af stofnfélögum Ljósmæðrafélags Íslands 2. maí 1919 og var gerð að heiðursfélaga 1959. Í Eyjum sat hún í stjórn slysavarnafélagsins Eykindils um árabil og var virkur félagi í Kvenfélaginu Líkn. Hún var heiðruð af konum í Eyjum, er hún hætti störfum þar. Hún dvaldi á Hrafnistu í Reykjavík frá 1967.
Maki (11. ágúst 1922): Hjálmar verzlunarstjóri, f. 25. jan. 1900, d. 18. ágúst 1940, Eiríks Hjálmarssonar kennara í Eyjum og Sigurveigar Rannveigar Pétursdóttur frá Löndum á Miðnesi í Gullbringusýslu.
Börn þeirra Hjálmars: Sigurbjörg deildarritari á Lanspítalanum, f. 2. apríl 1923, gift Viggó Einarssyni flugvirkja, d. 2005; Eiríkur skrifstofustjóri á Reykjalundi, f. 14. júlí 1924, d. 5. sept. 1971 kvæntur Hlíf Erlendsdóttur frá Keflavík; Helga Ágústa aðalgjaldkeri á skrifstofu Ríkisspítalanna, f. 2. júlí 1927, d. 7. júlí 2004, gift Árna Friðjónssyni skrifstofumanni; Anna skrifstofumaður í Hafnarfirði, f. 16. des. 1929, gift Kristleifi Einarssyni eftirlitsmanni hjá Íslenzka Álfélaginu í Straumsvík; Ása gjaldkeri hjá Áfengis- og tóbaksverzlun Ríkisins, f. 4. maí 1931, gift Hauki Ingimarssyni bifreiðasmið; Fríða Kristbjörg læknaritari á Landspítalanum, f. 4. febr. 1935, gift (skildu) Birgi Matthíasi Indriðasyni matsveini í Reykjavík.

Heimildir:

• Ljósmæður á Íslandi.
• Sigfús M. Johnsen: Saga Vestmannaeyja.
• Garður.is.