Blik 1938, 1. tbl./Eg sigli burt

Efnisyfirlit 1938

Helgi Sæmundsson:

EG SIGLI BURT.

Yfir sundin sumarblá

sigli ég frá ströndum.

Legg á höf með bros á brá.

Blæs í seglum þöndum.

Svala minni þyrstu þrá,

þeirri, sem ég dýpsta á.

— Stefni burt í leit að nýjum löndum.

Bláan gyllir sólin sæ;

sumar er að völdum.

Sigli ég í blíðum blæ

burt — á hafsins öldum.

Ef ég ströndu nýrri næ,

njóta vökudrauma fæ,

á ég von á fjársjóð — áður földum.

Kveð ég land í þýðum þey;

þrái sjóðinn falda.

Eftir bíður bláeyg mey;

burtu samt skal halda.

Yfir djúpið flýt þér fley,

feigðarnöf þér grandar ei.

— Hverri voð í völdum byr skal tjalda!