Árni Filippusson

Árni Filippusson

Árni Filippusson var barnakennari og skólastjóri í Vestmannaeyjum árin 1886-1893. Hann var fæddur að Háfshóli í Holtum 17. mars 1856. Hann var sonur Filippusar Bjarnasonar og Guðrúnar Árnadóttur.

Ætt og uppruni

Faðir Árna í Ásgarði var Filippus bóndi á Horni og síðar á Efri-Hömrum í Kálfholtssókn, Rang., f. 15. mars 1822, d. 14. október 1901, Bjarnason bónda á Sandhólaferju, „Glímu-Bjarna“, f. um 1779, d. 18. apríl 1866, Gunnarssonar bónda, smiðs og hreppstjóra á Sandhólaferju, f. 14. janúar 1736, d. 25. júní 1805, Filippussonar, og konu Gunnars, Þórunnar húsfreyju á Sandhólaferju 1801, f. 1749, d. 19. apríl 1809, Ingimundardóttur.
Móðir Filippusar og kona Bjarna Gunnarssonar var Valdís húsfreyja á Sandhólaferju 1816 og 1835, húsfreyja þar með Bjarna og níu börnum þeirra 1835, f. 1784, d. 10. október 1842, Jónsdóttir bónda í Ási og Sauðholti í Holtum, f. 1758, d. 24. janúar 1818, Gíslasonar bónda á Hamri og Hömrum syðri þar, f. 1721, d. 22. október 1805, og konu Jóns Gíslasonar, Guðrúnar húsfreyju, f. 1761, d. 15. ágúst 1833, Erlendsdóttur.

Móðir Árna Filippussonar og kona Filippusar á Horni var Guðrún húsfreyja á Horni 1860, f. 26. október 1833, d. 31. júlí 1866, Árnadóttir bónda og hreppstjóra á Stóra-Hofi á Rangárvöllum 1825-1855, f. 21. apríl 1790 á Sandhólaferju í Þykkvabæ í Djúpárhreppi í Holtum, d. 7. apríl 1855 á Stóra-Hofi, Jónssonar bónda í Ási og Sauðholti, f. 1758, d. 24. janúar 1818, Gíslasonar. (Árni faðir Guðrúnar á Horni og Valdís móðir Filippusar voru alsystkini).
Móðir Guðrúnar á Horni og kona Árna á Stóra-Hofi var (27. október 1825) Ingigerður húsfreyja, f. 2. september 1793, d. 25. ágúst 1855, Narfadóttir bónda á Háamúla í Fljótshlíð, f. 1763, d. 18. febrúar 1801, Jónssonar, og konu Narfa, Arndísar húsfreyju, f. 1760, d. 27. mars 1822, Ólafsdóttur.

Kona Árna Filippussonar (1898) var Gíslína Jónsdóttir húsfreyja, f. 18. apríl 1871, d. 18. júlí 1953.

---

Heimildir

• Samantekt ættar: Víglundur Þór Þorsteinsson.
• Rangvellingar. Valgeir Sigurðsson. Rangárvallahreppur, Hellu 1982.
• Manntöl.
• Íslendingabók.is.

Lífsferill

Hann dvaldist heima til tvítugsaldurs og stundaði nám á Rangárvöllum.
Eftir að hafa unnið sem sýsluskrifari í 8 ár í Hvolhreppi fluttist hann til Vestmannaeyja árið 1885. Bjó hann fyrsta árið í Nýborg og vann í verslun J.P.T. Bryde.
Hann réðist kennari við Barnaskólann haustið 1886. Aldrei var hann kallaður skólastjóri en brátt öðlaðist hann fullt traust yfirvalda til að stjórna eftirlitslaust skólastarfinu. Hann kenndi af óeigingirni og kenndi yngri börnum í frítíma sínum. Hann kenndi við Barnaskólann fram til ársins 1893.
Með Jóni Magnússyni stofnaði Árni sparisjóð í Vestmannaeyjum árið 1893. Frá 1893 fram á aldamót dvaldist Árni við verslunarstörf í Hafnarfirði og Reykjavík. Aldamótaárið fluttist hann svo aftur til Eyja og bjó þar til æviloka.

Árni var dugmikill og var ötull í öllu bæjarlífi Eyjamanna. Hann innti af hendi fjölmörg trúnaðarstörf og var frumkvöðull í stofnun félaga. Árið 1901 beitti Árni sér fyrir stofnun Ísfélags Vestmannaeyja og var hann gjaldkeri þess fram til 1931. Gjaldkeri Sparisjóðs Vestmannaeyja var hann frá 1900-1919. Einnig var hann gjaldkeri Bátaábyrgðarfélags Vestmannaeyja. Árni var bindindismaður og var umboðsmaður Stórtemplars í stúkunni Báru nr. 2.

Listrænn mun Árni hafa verið og meðal annars sem hann stundaði var leturgröftur, smíðar og smíðaföndur.

Eiginkona Árna hét Gíslína Jónsdóttir frá Ölfusi. Bjuggu þau hjá Eiríki Hjálmarssyni kennara fyrstu tvö árin eftir að þau fluttu til Eyja árið 1900. Þá byggðu hjónin stórt timburhús sem hét Ásgarður og stóð við Heimagötu 29. Þau eignuðust 4 börn og hétu þau Guðmundur, Filippus Gunnar, Guðrún og Katrín.

Árni Filippusson lést 6. janúar 1932, 75 ára að aldri.

Myndir

• 
• 
• 
• 
• 
• 
• 
• 
•