Þorsteinn Jónsson (héraðslæknir)

Sjá aðgreiningarsíðuna fyrir aðra sem hafa borið nafnið „Þorsteinn Jónsson“

---

Þorsteinn Jónsson, héraðslæknir og alþingismaður.

Þorsteinn Jónsson, héraðslæknir, var alþingismaður Vestmannaeyja frá 1887 til 1890, en þá sagði hann af sér þingmennsku. Þorsteinn var fæddur á Miðkekki í Flóa 17. nóvember 1840 og lést í Reykjavík þann 13. ágúst 1908.
Foreldrar hans voru Jón Þorsteinsson, fæddur 19. júní 1799, dáinn í júlí 1888, bóndi á Miðkekki og síðar í Hræringsstaðahjáleigu og síðari konu hans, Þórdísar húsfreyju, fædd 18. ágúst 1795, dáin 26. maí 1866, Þorsteinsdóttur í Hræringastaðahjáleigu, Runólfssonar, og konu Þorsteins Runólfssonar, Katrínar húsfreyju, f. um 1774, d. 15. apríl 1855, Erlendsdóttur.
Þorsteinn kvæntist þann 12. október 1865 Matthildi, síðar húsfreyju í Landlyst, fædd 6. janúar 1832, dáin 5. mars 1904, dóttur Magnúsar Þorkelssonar þá bónda í Eiðhúsum í Miklaholtshreppi, síðar að Fjarðarhorni í Helgafellssveit, og Sigríðar Pétursdóttur vinnukonu. Sonur Þorsteins var Jón Þorsteinsson.

Þorsteinn varð stúdent 1862 í Reykjavík. Hann las læknisfræði hjá Jóni Hjaltalín landlækni frá hausti 1862. Þorsteinn tók læknispróf árið 1865. Hann varð héraðslæknir í Vestmannaeyjum árið 1865 og gegndi því til ársins 1905. Þorsteinn var prófdómari við læknapróf 1907. Hann var einnig bókasali um hríð. Einnig hafði hann á hendi veðurathuganir fyrir dönsku veðurstofuna í fjölda mörg ár. Þorsteinn var hreppsnefndaroddviti frá 1874 til 1902. Hann var oft settur sýslumaður í Vestmannaeyjum um skemmri og lengri tíma. Þorsteinn fluttist til Reykjavíkur sumarið 1906 og dvaldist þar til æviloka.

---

Heimildir

• Guðlaugur Gíslason: Eyjar gegnum aldirnar. Frásagnir af mannlífi og atburðum í Vestmannaeyjum frá gamalli tíð og nýrri. Reykjavík, 1982.
• Prestþjónustubækur.
• Læknar á Íslandi. Gunnlaugur Haraldsson. Þjóðsaga ehf. 2000.