Matthías Gíslason (Byggðarenda)
Matthías Gíslason, Byggðarenda, var fæddur að Vatnsholti í Flóa í Hraungerðishreppi þann 11. maí 1893 og lést 24. janúar 1930. Foreldrar Matthíasar voru Gísli Karelsson, f. 25. nóv. 1868, frá Sjávargötu á Eyrarbakka. Hann drukknaði í sjóslysi á Stokkseyrarsundi ásamt sjö öðrum sjómönnum 2. apríl 1908. Kona hans, Jónína Margrét Þórðardóttir, f. 25. maí 1870, d. 4. sept. 1951, var frá Vatnsholti í Villingaholtshreppi í Árnessýslu.
Matthías kvæntist Þórunni Júlíu Sveinsdóttur þann 10. maí 1917. Fyrsta barn þeirra Þórunnar og Matthíasar fæddist 17. des. 1916 og fékk nafnið Ingólfur Símon (Símonar-nafnið er Símon Dalaskáld). Frá Gjábakka fluttust þau Þórunn og Matthías að Vestmannabraut 27, í hús sem hét Garðsauki. Það átti Árni Jónsson útgerðarmaður, hann átti vélbátinn Gissur hvíta. Þar fæddist Sveinn 14. ágúst 1918 og Óskar 22. mars 1921. Frá Garðsauka flytjast þau hjón að Vallarnesi og síðan á Hof við Urðaveg. Á þessum árum eignuðust þau Gísla, fæddur 17. apríl 1925, en hann lést í bílslysi í Reykjavík aðeins 8 ára gamall. Matthildur Þórunn fæddist 13. júní 1926. Það var síðan líklega 1928 sem þau kaupa minnsta húsið við Brekastíg, nr. 15a, en húsið heitir Byggðarendi.
Matthías byrjaði 15 ára gamall sjómennsku en fór til Vestmannaeyja árið 1915. Formennsku byrjaði hann 1919 á Heklu. Síðar var Matthías formaður á fleiri bátum, Heklu VE, 1919, Unni ÁR, 1920, Kristbjörgu I 1926-1928, Enok 1929.
Árið 1930 var hann formaður á Ara og á honum fórst hann með fimm mönnum þann 24. janúar 1930 suður af Bjarnarey í suðaustan ofsaveðri.
Myndir
Heimildir
- Sigmar Þór Sveinbjörnsson. Sjómannadagsblað Vestmannaeyja 2006. Vestmannaeyjar, 2006.
- Sjómannablaðið Víkingur. Farmanna- og Fiskimannasamband Íslands.
- Viðbót við heimildir Gísli Eyjólfsson frá Bessastöðum.