Helgi VE-333
Vélbáturinn Helgi VE-333 var smíðaður í Vestmannaeyjum. Hann var 119 rúmlestir að stærð og þar með stærsta skip sem smíðað hafði verið á Íslandi.
Haustið 1935 kom Helgi Benediktsson að máli við Gunnar Marel Jónsson og bað hann að undirbúa smíði skips sem yrði allt að 100 smálestum. Kom eikin til Eyja þá um veturinn og hófst smíði skipsins í mars árið 1936. Helgi var lengi í smíðum og var honum ekki hleypt af stokkunum fyrr en sumarið 1939. Til síldveiða hélt hann fullbúinn 22. júlí það ár.
Hann fékkst ekki tryggður hjá Bátaábyrgðafélagi Vestmannaeyja þar sem félagið ábyrgðist ekki stærri báta en 100 smálestir. Þegar siglingar hófust með ísfisk til Bretlands árið 1940 myndaði Helgi Benediktsson sérstakan tryggingasjóð um Helga og Skaftfelling. Þann sjóð gerðu stjórnvöld upptækan í desember 1949 og brá því Helgi á það ráð að tryggja skipin hjá Samvinnutryggingum. Skyldi sú trygging taka gildi þann 9. janúar árið 1950. Helgi fórst hinn 7. janúar.
Að morgni 7. janúar 1950 strandaði Helgi á Faxaskeri með tíu manns um borð og létust allir í slysinu. Slyssins varð vart frá Kirkjubæ, en björgunaraðgerðir reyndust árangurslausar.
Sjá einnig
- Faxasker. Ítarleg lýsing frá þessu hörmulega sjóslysi.
Heimildir
- Skrá yfir myndir og málverk Byggðasafns Vestmannaeyja. Eyjaskinna 2. rit. Vestmannaeyjum: Sögufélag Vestmannaeyja, 1983.