Jón Westmann

Úr Heimaslóð, Sögusetri Vestmannaeyja
Stökkva á: flakk, leita

Jón Jónsson Westmann fæddist að Kirkjubæ einhverntíma á milli 1595 og 1612, en heimildum ber ekki saman um fæðingardag hans. Hann var sonur Jóns Þorsteinssonar, píslarvotts, prests að Kirkjubæ og konu hans Margrétar Jónsdóttur.

Jón var líklega yngstur systkina sinna, en margt bendir til, að hann hafi verið 15 ára gamall árið 1627, þegar Tyrkjaránið á sér stað. Ræningjarnir drápu föður hans, og var hann numinn brott með móður sinni og systur, Margréti (alnöfnu móður sinnar).

Hann hlaut menntun í Algeirsborg, og komst þar til metorða. Þar sem hann var mjög skapstór og harðfengur, þá komst hann í tign skipstjóra og yfirforingja hjá sjóræningjum. Hann fór svo frá Algeirsborg í margar ferðir, undir nafninu Jón Westmann. Í einni ferð er sagt að hann hafi snúið heim til El Jezair (Algeirsborg) með tuttugu skip sem hann hafði hertekið.

Að lokum beið hann ósigur í orrustu á eyjunni Möltu, og átti eftir það að vera brenndur á báli. En hann var keyptur af spænskum manni, og dvaldist hjá honum um hríð og fara sögur af tafli þeirra á milli.

Árið 1646 átti hann leið til Kaupmannahafnar, en þar fékk hann starf sem sjókortagerðarmaður konungs, en einnig er talið að hann hafi unnið verkfræðileg afrek í Kaupmannahöfn, m.a. við hafnargerð.

Hann kvæntist danskri konu rétt fyrir dauða sinn þann 29. mars 1651, en þau áttu áður eina dóttur, Margrete.


Heimildir