Hlöðver Johnsen
Fullu nafni hét hann Jón Hlöðver Johnsen fæddist í Vestmannaeyjum 11. febrúar 1919. Hann var sonur hjónanna Árna J. Johnsen og Margrétar Jónsdóttur frá Suðurgarði. Súlli, eins og Hlöðver var jafnan kallaður, ólst að miklu leyti upp hjá móðurafa sínum og ömmu í Suðurgarði, þeim Jóni Guðmundssyni og Ingibjörgu Jónsdóttur.
Hann lauk prófi frá Menntaskólanum í Reykjavík, iðnskóla og matsveinaskóla.
Hann var sjómaður í nokkur ár og útgerðarmaður, gerði m.a. út hið þekkta skip Gottu VE sem áður hafði farið í frægan leiðangur til Grænlands að sækja sauðnaut. Hann starfaði við verslunarstörf um hríð og var bankastarfsmaður í 12 ár.
Hann starfaði með vísindamönnum við rannsóknir á nýja hrauninu á Heimaey og síðar við hraunhitaveituna.
Hann var landskunnur fuglafangari og kleif m.a. Eldey fjórum sinnum. Hann stundaði lundaveiði og eggjatöku frá unga aldri til dauðadags, aðallega í Bjarnarey. Hlöðver skrifaði bókina Bergið klifið, en það eru minningar hans frá æskuárum þar sem lýst er lífinu í byggðinni fyrir ofan hraun auk þess sem veiðimennsku í úteyjum eru þar gerð góð skil.
Hlöðver var kvæntur Sigríði Haraldsdóttur frá Garðshorni og áttu þau fjögur börn. Árið 1952 byggðu þau sér húsið Saltaberg og þótti arkítektúr þess á þeim tíma mjög sérstakur og þykir raunar enn.