Ritverk Árna Árnasonar/Vísnabálkur, afmæli o.fl.

Úr fórum Árna Árnasonar

Vísnabálkur, afmælisljóð og fleira

(Ýmsar tækifærisvísur)

Okkar viljum óskum benda

að sem blóm í grænni hlíð

lífið það til leiðarenda

og lánið elti alla tíð.

Góðar kveðjur gerum senda

gestunum úr Blönduhlíð.

★

Aldurhniginn örva grér

ærumaður gáfur ber.

Ellin verði indæl þér,

aðstoð sína drottinn lér.

★

Harla lítið heyrist frá

herrunum í lánasjóði.

Bið þig vinur um að sjá

að mér verði svarað góði.

Enga hefi á því trú,

eftir fyrri reynslu minni,

þetta bjargráð bregðist nú,

ef bætir um með tilsjá þinni.

★

Heill af hjarta, vinur,

haltu beint á vonarmið.

Strákar hafa stærsta lukku,

stattu hvergi við.

★

Allt er nú orðið fimmtugum fært,

sem fertugum gengur verr.

Þetta hef ég af lífinu lært,

svo lyfti ég skál fyrir þér.

★

Allt er enn sem áður fyrr,

alls ei þekkist grátur.

Ef við værum enn með þér

yrði kanske hlátur.

★

Rúms og tíma hverfast hjól

hratt með föstu taki.

Yngismanna ævisól

yljar þér að baki.

★

Örlaganna kiljan köld

knörrinn lífs ei taki

hækka segl um heila öld

hefur því að baki.

★

Margar eru meyjarnar

mátulega liprar.

Syrgja allar eyjarnar,

ef þú lengur piprar.

★

Vinur, ég bind þér úr braglínum vönd

sem að ber til þín kveðjuna mína.

Gæfan æ vefji sín geislandi bönd

yfir gjörvöll þín ævispor, Stína.

★

Leiði þig gæfunnar gullfagra hönd,

glóbjarta sveiga þér knýti úr rósum.

Hvar, sem að liggur þín leið yfir lönd,

þér leiðbeini guð þá með skínandi ljósum.

★

Fáðu gæði farsældar

frí við mæðu nauða.

Lifðu í næði lukkunar

í lífi bæði og dauða.

★

Greru úr garði

hjá góðu fólki

strákar tveir stæltir.

Ég sá í svanna

sælar tíðir,

þú hremmdir hvali

á hveli suður.

Heill og sæll höldur,

hamingju vinur.

Drýgðu enn dáðir

af drengskap miklum.

★

Þið fáið nú gesti að gleðiborði

og góðbænir vina í hverju orði.

En þegar svo klukkan kallar átta

kallið til bóls og farið að hátta.

————

Ef símafólk brestur dug og dáð

og djörfung til þess, það áformar.

Þá býður því enginn betri ráð

og blessunarríkari´en Þormar.

Eyjasímans fólk er fátt,

finnst óvíða betra.

Það hefir töfl við tímann átt

og telft í marga vetra.

Ljúfar dísir lífs og friðar

leiði þig um gæfuveg.

Sól er aldrei setzt til viðar

sinni blíðu vefji þig.

★

Æviþættir

Unaðsóma,

angan blóma

æska og vor í skauti ber.

Vonir rætast,

varir mætast

vina, er ástin flug sitt lér.

Glóa skálar,

gleðin bálar,

glymur dans og hornaspil.

Þá er kæti

lífkvik læti,

ljúf þeim anda, er finnur til.

Árin líða

ævitíða

út í tímans reginhyl.

Sorgir mæða,

sárin blæða,

sést ei tíðum handaskil.

Fyrr en varir

flökta á skari

fjarra daga skærust ljós.

Straumar brotna,

stanza, þrotna

stilltan loks við feigðarós.

Hvað segir þú um þenna bragarhátt? Finnst þér hann ekki láta vel í eyrum?

Úr fórum Árna Árnasonar, efnisyfirlit