Drífa Björnsdóttir

Drífa Björnsdóttir ljósmóðir fæddist á Akranesi 2. nóv. 1953.
Foreldrar hennar eru Björn Halldórs hafnsögumaður og lögregluþjónn á Akranesi, en síðustu starfsárin húsvörður við Háskóla Íslands í Reykjavík, f. á Smáhömrum í Kirkjubólshreppi í Strandasýslu 9. maí 1932, sonur Björns Halldórssonar bónda á Smáhömrum, f. 22. sept. 1903, d. 20. sept. 1932, Hávarðssonar og konu Björns bónda, Elínborgar Steinunnar húsfreyju og verkakonu, f. í Þrúðardal í Fellshreppi í Strandasýslu 16. sept. 1896, d. 28. maí 1980, Benedikts, f. í Fellssókn 1868, Guðbrandssonar og barnsmóður Benedikts, Oddfríðar, f. 4. ágúst 1874, d. 15. marz 1948, Gísladóttur. Móðir Drífu og barnsmóðir Björns Halldórs er Guðrún sjúkraliði, f. á Akranesi 5. jan. 1930, Guðlaugs Daníels kaupmanns, útgerðarmanns, smiðs og byggingafulltrúa, f. 16. nóv. 1903, d. 11. maí 1964, Vigfúsar, f. 1869, Magnússonar. Móðir Guðrúnar var Sigrún húsfreyja á Akranesi, f. í Ási í Garðahreppi í Gullbringusýslu 2. okt. 1907, d. 21. maí 1942, Sigurðar, f. 1863, Jónssonar og konu Sigurðar, Guðrúnar Árnadóttur, f. 1879.
Halldór bóndi á Smáhömrum var bróðir Hávarðínu ættmóður Jónu Dóru Kristinsdóttur ljósmóður, þau komin af Þiðriki bónda Ólafssyni í Geirshlíð í Flókadal í Borgarfirði. Hann var líka ættfaðir Guðnýjar Bjarnadóttur frá Kjalvararstöðum í Reykholtsdal, ljósmóður í Eyjum.
Drífa lauk gagnfræðaprófi á Akranesi 1970 og viðbótarári við Gagnfræðaskólann þar 1977, ljósmæðraprófi við Ljósmæðraskóla Íslands lauk hún 29. sept. 1979 og BSc.- prófi í hjúkrunarfræði við Háskóla Íslands 26. júní 2005.
Hún var ljósmóðir á Akranesi frá 10. okt. 1979 - ágúst 1994, leysti af í Eyjum 1. júlí 1993 - 1. ágúst 1993 og hefur verið ljósmóðir í Eyjum frá 10. ágúst 1994, en hefur einnig unnið lítillega sem hjúkrunarfræðingur á Hraumbúðum þar.
Formaður Vesturlandsdeildar Ljósmæðrafélags Íslands var hún um árabil frá 1982.
Maki, skildu: Sigurður Karl blikksmiður, f. 15. des. 1960, Ragnarsson bifreiðastjóra á Akranesi, Felixsonar og Elísabetar sjúkraliða Karlsdóttur frá Akranesi.
Barn: Hildur Sólveig, f. á Akranesi 20. marz 1983, nemi í sjúkraþjálfun við Háskóla Íslands. Hún er í sambúð með Sindra Ólafssyni hagfræðinema við HÍ, f. í Eyjum 19. maí 1983.

Heimildir:

• Upphaflegur höfundur var Víglundur Þór Þorsteinsson.
• Ljósmæður á Íslandi. Rvk 1984.
• Vestfirzkar ættir IV. Rvk 1968.
• Gils Guðmundsson: Frá yztu nesjum, vestfirzkir sagnaþættir V. Rvk 1949.
• Borgfirzkar æviskrár.
• Drífa Björnsdóttir.