Eiríkur Runólfsson (Vesturhúsum)
Eiríkur Runólfsson vinnumaður á Vesturhúsum fæddist 30. mars 1828 á Felli í Mýrdal og drukknaði 19. janúar 1869.
Foreldrar hans voru Runólfur Runólfsson vinnumaður á Felli, f. 1788, d. 1. ágúst 1839 á Brekkum í Mýrdal, og barnsmóðir hans Sigríður Ingimundardóttir, þá vinnukona á Felli, f. 1789 í Mýrdal, d. 19. júlí 1846 á Kirkjulandi í A-Landeyjum.
Eiríkur var með móður sinni í vinnumennsku hennar á nokkrum bæjum í Mýrdal til 1836, með föður sínum á Brekkum þar 1836-1840. Hann var niðursetningur í Steig og Suður-Hvoli þar 1840-1845, vinnumaður á Suður-Hvoli þar 1845-1860, þá vinnumaður á Hryggjum þar til 1867, þá aftur á Hvoli til 1868.
Hann fluttist til Eyja 1868, var vinnumaður á Vesturhúsum og drukknaði af bát, sem hvolfdi við Leið í janúar 1869.
Eiríkur var ókvæntur og barnlaus í Eyjum. Hann fékk viðurnefnið jarl.
Heimildir
- Samantekt: Víglundur Þór Þorsteinsson.
- Prestþjónustubækur.
- Sögur og sagnir úr Vestmannaeyjum. Jóhann Gunnar Ólafsson. Þorsteinn Johnson 1938-1939.
- Vestur-Skaftfellingar 1703-1966. Björn Magnússon. Leiftur 1970-1973.