Blik 1960/Herjólfi fagnað

Efnisyfirlit 1960

Herjólfi fagnað

Vélskipið Herjólfur.

Laugardaginn 12. des. 1959 lagðist „Vestmannaeyjaskipið“

Herjólfur að bryggju hér í Eyjum fyrsta sinni. Skipið kom frá Hollandi, þar sem það var byggt, með viðkomu í Leith. Heimahöfn þess er Vestmannaeyjar. Í tilefni þessa merkisatburðar í samgöngumálum kaupstaðarins, hafði Sigurgeir Kristjánsson, lögregluþjónn, ort eftirfarandi kvæði, sem var flutt á Básaskersbryggjunni, er skipið lagðist þar að.

Við bjóðum þig velkominn, Herjólfur, heim

til hafnar við norðlægar slóðir.

Við biðum þín lengi, og þökk veri þeim,

sem þér voru hollir og góðir.

Þú komst, þó að nótt væri niðdimm og löng,

og nú skal þér fagnað með ræðum og söng.

Þeir vissu það áður, sem ýttu úr vör

við útsker hjá rjúkandi hrönnum,

ef syrtit í álinn, þá seinkaði för

hjá sjóhröktum erfiðismönnum.

það var eins og brimhljóðið boðaði grand,

er boðarnir féllu við Eyjar og sand.

Loks mótaði þekkingin tækninnar tök

á tímum, sem við stöndum nærri.

Þá rættust þeir draumar, sem vörðust í vök,

og víst eru sigrarnir stærri!

Í dag birtist Herjólfur, skínandi skeið,

vort skip, er gegn ólgunni klýfur sér leið.

Fylgi þér, Herjólfur, hamingjudís

um hafið á framtíðarleiðum.

Þín sigling sé örugg og vegleg og vís,

þó vindarnir blási í reiðum.

Svo eflir þú tengslin við Eyjar og land,

þótt oft falli boði við Landeyjasand.

Sigurgeir Kristjánsson.