Stafsnes
Einnig er til samnefnt hús sem heitir eftir nesinu sem lýst er í þessari grein. Sjá Stafnsnes.
Stafsnes (stundum ritað Stafnsnes) er langt og mjótt nes sem gengur út frá Dalfjalli við Upsaberg. Það myndar lítinn fjörð með Dalfjalli, og í botni þess er Stafsnesfjara.
Stafsnes er einn fegursti staður á Heimaey og er útsýni þaðan til úteyjanna í suðri stórfenglegt. Á nesinu sjálfu er stysta vegalengd milli Heimaeyjar og Smáeyja, rétt um 700 m í Hrauney. Þrátt fyrir stuttan spotta er ekki hægt um sund út í eynna sökum mikilla og harðra strauma við Hrauney. Í Stafsnesfjöru er útsýnið fagurt til úteyjanna og má sjá Álsey, Suðurey, Hellisey, Geldung og Súlnasker. Fegurðin er ólýsanleg í þessu umhverfi og er fegurðin mest síðsumars, þegar kvölda tekur. Þá tekur kyrrðin og kvöldsólin völdin og framreiðir sitt fegursta samspil.
Ekki er Stafsnes greiðfærasti staðurinn á Heimaey, en sérstaða Stafsness er fyrirhafnarinnar virði. Það þarf að ganga úr Herjólfsdal upp á Dalfjall og þá tekur við brött ganga niður í Stafsnes. Þeim mun erfiðari er gangan upp, því hlíðarnar eru nærri lóðréttar á tíðum.
Heimildir
- Hvað er „á bak við“ Herjólfsdal? Þjóðhátíðarblað Vestmannaeyja 1959.