Karólína Sigurðardóttir
Karólína Sigurðardóttir fæddist þann 9. október 1899 að Vallarhjáleigu í Hvolhreppi. Hún lést þann 10. ágúst 1989 á sjúkrahúsinu í Vestmannaeyjum. Karólína var dóttir hjónanna Geirlaugar Guðmundsdóttur, frá Steinum undir Eyjafjöllum og Sigurðar Unasonar, sjómanns.
Karólína giftist Jóni Sigurðssyni, Jónssonar frá Syðstu Mörk undir Eyjafjöllum árið 1922. Karólína og Jón byggðu sér húsið Ártún við Vesturveg 20, í hvert þau fluttu árið 1926, en byggðu síðar húsið nr. 73 við Vestmannabraut, eftir að hafa misst Ártún í hendur „óvandaðs manns“ eins og Sigurður Diddi pabbi komst að orði í minningargrein um Kristínu systur sína. Á Vestmannabrautinni bjuggu Jón og Karólína til dánardægurs.
Karólína og Jón gengu í hjónaband í nóvember 1922 en Karólína var ættuð úr Rangárþingi og voru þau hjón nokkuð skyld út frá Högna Sigurðssyni. Hjónaband Jóns og Karólínu varaði í 57 ár. Þau hófu sinn búskap í Laugardal hjá Eyjólfi og Nikolínu.
Karolína og Jón eignuðust fjögur börn, 1) Geirlaugu, f. 20. júní 1923 - d. 31. maí 1995, 2) Kristínu, f. 12. janúar 1926 - d. 9. ágúst 2004, 3) Margréti, f. 9. október 1931 og 4) Sigurð Didda pabba, f. 24. júlí 1940 - d. 25. júlí 2011.
