Sjómannadagsblað Vestmannaeyja 2008/Verðandi 70 ára
Skipstjóra- og stýrimannafélag Vestmannaeyja var stofnað 27. nóvember 1938 og verður því 70 ára í haust en nafninu var breytt árið 1942 í Skipstjóra - og stýrimannafélagið Verðandi og var höfundur þessarar nafngiftar Þorsteinn Jónsson frá Laufási. Fyrsti formaður félagsins var Árni Þórarinsson og var hann formaður í 7 ár. Síðan hafa nokkuð margir tugir góðra manna starfað sem formenn og stjórnarmenn í Verðandi.
Ég hef alltaf borið mikla virðingu fyrir því sem þessir fyrrverandi Verðandimenn hafa staðið fyrir í gegnum tíðina, með áhugann einan að vopni. Þessir snillingar komu t.d. tilkynningarskyldu á hjá Eyjaflotanum, börðust fyrir því að fá gúmmíbjörgunarbáta ásamt ýmsum öðrum góðum hlutum. Ég efast stórlega um að nokkurt stéttarfélag á Íslandi hafi gert jafn mikið og bjargað eins mörgum mannslífum eða komið í veg fyrir stórslys og Verðandi hefur gert. Yfirleitt liðu einhver ár frá því
að framfarir urðu hér á Eyjaflotanum þar til þær urðu annars staðar. Enn í dag, reynum við að styrkja þau málefni sem varða öryggi sjómanna. Vissulega hafa ekki alltaf verið jólin hjá Verðandi og oft var stutt í að félagið legði upp laupana enda ekki mörg fyrirtæki eða félög sem ná þessum aldri. En Verðandi, sem er lítið félag í Eyjum, hefur staðið í báða fætur og stendur enn og mun standa áfram þrátt fyrir miklar sameiningar hjá skipstjórafélögum um allt land í eitt stórt félag. Sameining er ekki lausnarorð og verður aldrei. Bara það, að félagsmaður borgar ca. helmingi minna í félagsgjöld (2,5% af kauptryggingu) á ári en tíðkast í öðrum félögum, segir ansi mikið um það hvernig Verðandi vill starfa og fyrir hverja Verðandi starfar. Í haust er ætlunin að við gefum út veglegt afmælisblað og þá verður farið nánar í sögu Verðandi og hvernig við stöndum vörð um félagið og uppruna þess. Einnig gengst félagið fýrir stórdansleik milli jóla og nýárs.
Núverandi stjórn skipa: Bergur Kristinsson, Sigmar Sveinsson, Bergur Guðnason, Andrés Sigurðsson, Halldór Guðbjörnsson og Jarl Sigurgeirsson.