Stafsnes
Einnig er til samnefnt hús sem heitir eftir nesinu sem lýst er í þessari grein. Sjá Stafnsnes.
Stafnsnes er langt og mjótt nes sem gengur út frá Dalfjalli við Upsaberg. Það myndar lítinn fjörð með Dalfjalli, og í botni þess er Stafnsnesfjara.
Stafnsnes er einn fegursti staður á Heimaey og er útsýni þaðan til úteyjanna í suðri stórfenglegt. Á nesinu sjálfu er stysta vegalengd milli Heimaeyjar og Smáeyja, rétt um 700 m í Hrauney. Þrátt fyrir stuttan spotta er ekki hægt um sund út í eynna sökum mikilla og harðra strauma við Hrauney. Í Stafnsnesfjöru er útsýnið fagurt til úteyjanna og má sjá Álsey, Brandur, Hellisey, Geldung og Súlnasker. Fegurðin er ólýsanleg í þessu umhverfi og er fegurðin mest síðsumars, þegar kvölda tekur. Þá tekur kyrrðin og kvöldsólin völdin og framreiðir sitt fegursta samspil.
Ekki er Stafnsnes greiðfærasti staðurinn á Heimaey, en sérstaða Stafnsness er fyrirhafnarinnar virði. Það þarf að ganga úr Herjólfsdal upp á Dalfjall og þá tekur við brött ganga niður í Stafnsnes. Þeim mun erfiðari er gangan upp, því hlíðarnar eru nærri lóðréttar á tíðum.
Af dýralífi í Stafnsnesi er helst að nefna æðarfuglinn. Æðarfuglinn verpir upp við klettaveggina í grýttri fjörunni og einnig á Stafnsnesi. Staðurinn hentar vel fyrir fuglinn þar sem að verður er almennt hagstætt og vindur hægur. Rannsóknarmenn hafa bent á að ef hefja skyldi dúntekju á Heimaey þá væri Stafnsnes ákjósanlegasti staðurinn. Af 50 hreiðrum á Heimaey sem að skoðuð voru í rannsókninni voru 23 þeirra í Stafnsnesi.
Heimildir
- Hvað er „á bak við“ Herjólfsdal? Þjóðhátíðarblað Vestmannaeyja 1959.
- Dr. Ingvar Atli Sigurðsson og Cand. Sci. Páll Marvin Jónsson. Æðarvarp á Heimaey. Vestmannaeyjar: Rannsókna- og fræðasetur Vestmannaeyja, 2004.