Ritverk Árna Árnasonar/Jóhannes Gíslason (Eyjarhólum)

Kynning.

Jóhannes Gunnar Gíslason skrifstofumaður frá Eyjarhólum, búsettur á Kanastöðum, fæddist 14. júlí 1906 á Stafnesi í Hvalsnessókn á Reykjanesi og lést 2. janúar 1995.
Foreldrar hans voru Gísli Geirmundsson þurrabúðarmaður á Eyjarhólum, f. 9. janúar 1874 á Kalmanstjörn á Reykjanesi, d. 9. júlí 1919 og kona hans Þórunn Jakobína Hafliðadóttir, f. 30. janúar 1875 í Fjósum í Mýrdal, d. 27. maí 1965.

Kona Jóhannesar Gíslasonar var Guðrún Einarsdóttir húsfreyja, f. 28. febrúar 1909, d. 28. desember 1986.

Börn Jóhannesar og Guðrúnar eru:
1. Erna, f. 2. janúar 1937. Maki: Sveinbjörn Hjálmarsson Jónssonar, f. 11. september 1931.
2. Hjálmar Þór, f. 23. september 1940. Maki (skildu): Helga Sveinbjörnsdóttir Hjartarsonar, f. 31. október 1943.

Úr fórum Árna Árnasonar símritara:
Bjargveiðimannatal.
Jóhannes er röskur meðalmaður á hæð, fremur grannur, en samsvarar sér þó vel, dálítið lotinn, en þó ekki til lýta. Hann er svarthærður með stór kollvik, langleitur, beint nef og hátt enni, en ljós í andliti. Hann er vel styrkur og fylginn sér, þolinn og þrautseigur. Hann virðist nokkuð daufur í skapi gagnvart fjöldanum, en í sínum hóp er hann kátur og hrókur fagnaðar.
Veiðimaður er Jóhannes ágætur, rólegur og gætinn. Hann hefir fundið góðan veiðistað í Álsey í norðanátt og hefir staðurinn verið nefndu ,,Jóasteinn“.

Úr fórum Árna Árnasonar, efnisyfirlit

---

Heimildir

• Samantekt: Víglundur Þór Þorsteinsson.
• Eyjar og úteyjalíf – Úrval verka Árna Árnasonar símritara frá Grund. Sögufélag Vestmannaeyja í samstarfi við Safnahús Vestmannaeyja 2012.
• Garður.is.
• Íslendingabók.is.
• Manntöl.