Dvergasteinn

Dvergasteinn

Húsið Dvergasteinn (áður Brandshús) stóð við Heimagötu 7a. Það hýsti Barnaskóla Vestmannaeyja á árunum 1884-1904 og var því jafnan kallað Gamla skólahúsið. Barnaskólinn var þar starfræktur í 20 ár. Meðan hann var aðeins í einni deild, var kennt á aðalhæð hússins. Aagaard sýslumaður geymdi svo skjalasafn síns embættis á risi hússins. Þar lát það á gólfinu og nemendur Barnaskólans léku sér gjarnan með það. Fljótlega kom þó í ljós að mikill músagangur var í húsinu. Þar sem lítið matarkyns fannst í húsinu þá nöguðu mýsnar jafnan pappíra skjalasafnsins. Eftir að Eiríkur Ögmundsson flutti húsið nefndi hann það Dvergastein, eftir Dvergasteini við Seyðisfjörð.

Árið 1906 stofnsetti Edvard Fredriksen bakarí í húsinu. Ekki var bakaríið langlíft í húsinu því einungis eftir fjögurra mánaða bakstur kviknaði í því og það brann nokkuð. Allt sem brann var óvátryggt og því var bakaríið ekki starfrækt lengur, uppbygging þótti ekki borga sig.

Árið 1907 bjuggu í Dvergasteini hjónin Magnús Árnason og Ingigerður Bjarnadóttir sem síðar byggðu og bjuggu í Lágafelli (Vestmannabraut 10) í tugi ára.

Árið 1908 flytja til Eyja hjónin Guðmundur Magnússon og Helga Jónsdóttir, sem síðar byggðu Goðaland á Flötum (Flatir 16). Þessi hjón keyptu Dvergastein og bjuggu þar í þrjú ár.

27. júlí 1911 kaupir Magnús Jónsson frá Minni-Borg undir Eyjafjöllum Dvergastein. Hann og kona hans, Guðrún Jónsdóttir, bjuggu í húsinu í 5 ár.

15. júlí 1916 keyptu hjónin Eiríkur Önundarson og Júlía Sigurðardóttir húsið og bjuggu þau þar í tugi ára. Uppgefið kaupverð var þá 2000 krónur.

Dvergasteinn var hlaðinn úr móbergi úr Heimakletti árið 1883 og voru steinarnir límdir saman með kalki. Húsið fór undir hraun í gosinu, líklega þann 26. mars, en þá fóru mörg hús í nágrenninu undir hraunflæðið, t.d. húsin Godthaab, Brydehus og gamla sundlaugin.

---

Heimildir

• Þorsteinn E. Víglundsson. Blik, ársrit gagnfræðaskólans í Vestmannaeyjum. Maí 1962.