Gústav Stefánsson (Bergholti)

Gústaf Stefánsson, Ási, var fæddur 22. ágúst 1898 og lést á Sjúkrahúsi Vestmannaeyja þann 24. janúar 1943. Foreldrar hans voru Stefán Gíslason og kona hans Sigríður Jónsdóttir frá Mandal.

Eiginkona hans var Kristín Guðmundsdóttir. Þau bjuggu að Ási og Stóra-Bergholti.

Hann byrjaði snemma að stunda sjóinn á opnum báti með Ólafi Ástgeirssyni í Litla-Bæ. Árið 1923 tók hann við formennsku á bátnum Gústaf (9 tonn) sem faðir hans átti. Árið 1927 tekur Gústaf við formennsku á Braga.

---

Heimildir

• Sjómannablaðið Víkingur. 8 tbl. 1968. Farmanna- og Fiskimannasamband Íslands.

Frekari umfjöllun

Gústav Stefánsson frá Ási, formaður og útgerðarmaður, fæddist 22. ágúst 1899 og lést 24. janúar 1943.
Foreldrar hans voru Stefán Gíslason í Ási, útgerðarmaður og formaður, f. að Hlíðarhúsum 6. ágúst 1876, d. 11. janúar 1952 og kona hans Sigríður Jónsdóttir húsfreyja, f. 27. apríl 1877, d. 3. desember 1941.

Kona Gústavs var Kristín Guðmundsdóttir, f. 27. maí 1899 í Sigluvík Landeyjum, d. 12. mars 1986.

Börn Gústavs og Kristínar:
1. Stefanía, f. 5. ágúst 1918, d. 22. júní 1992.
2. Hálfdan, f. 6. júlí 1920, d. 31. desember 1992.
3. Inga, f. 7. júní 1922, d. 23. apríl 1948.

Úr fórum Árna Árnasonar símritara:
Bjargveiðimannatal.
Gústav var rösklega meðalamaður á hæð, þreklega vaxinn um herðar, rauðbirkinn á hár og skegg og nokkuð freknóttur og rjóður í andliti. Hann var vel sterkur maður og eldsnar í öllum hreyfingum og mjög fylginn sér. Heldur var Gústav þungur í skapi og mjög tilbaka, en gat þó verið léttur í sínum hóp, en seintekinn var hann fyrir allan almenning.
Gústav var einn af slyngustu veiðimönnum yngri kynslóðarinnar, enda vaninn til veiða í Ystakletti frá barnæsku undir leiðsögn föður síns, hins mikla veiðisnillings Stefáns í Ási Gíslasonar.
Gústav var lengst af í Ystakletti, en var þó í Álsey nokkur sumur og var þar mjög liðtækur meðan heilsan leyfði. Hann varð snemma mjög illa haldinn vegna magnaðrar sykursýki og háði það honum mjög við veiðar hin síðustu ár í Álsey, enda lést hann úr veiki þessari eftir langa veru á sjúkrahúsinu hér aðeins rúmlega 44 ára gamall. Lífsstarf Gústavs var annars sjómennska meðan heilsan leyfði, og var hann t.d. formaður um skeið með mb Gústav VE-126 og gekk vel.

---

Heimildir

• Eyjar og úteyjalíf – Úrval verka Árna Árnasonar símritara frá Grund. Sögufélag Vestmannaeyja í samstarfi við Safnahús Vestmannaeyja 2012.
• Íslendingabók.is.
• Landeyingabók – Austur-Landeyjar. Valgeir Sigurðsson og fleiri. Ritstjóri: Ragnar Böðvarsson. Austur-Landeyjahreppur, Gunnarshólma 1999.
• Manntöl.

Myndir

• 
• 
•