Blik 1938, 2. tbl./Í dag er vor.

Efnisyfirlit 1938

Helgi Sæmundsson:

Í DAG ER VOR.

Í dag er sólskin í sveitum,

er sigrandi völdin fær,

og drottnandi vættur vorsins

á viðkvæma strengi slær.

Í dag er söngur í sálu,

og seiðandi þrár í hug.

— Hraðfara svanir hugans

hefja sitt vængjaflug.

Í dag er tign yfir tindum,

er töfrar hvern byggðarmann.

Og norn hinna örvandi óska

örlagavefi spann.

Vorannir bóndans bíða,

og bjartsýni á hann enn.

Hann ætlar að drýgja dáðir

og draumar hans rætast senn.

Í dag er himinninn heiður

og helgi í sálu manns.

— Í dag er vorið að völdum

og vakir í byggðum lands.

— Því burtu er vetur vikinn

með vald sitt og ægimátt.

— Horfinn í fyrnsku og fjarska.

— Hann flýði í norðurátt.

Í dag er ljóðandi lækur,

er lýður um gróinn völl;

sem kastaðist fram af klettum,

og kvaddi hin bláu fjöll,

— og hafði ólgandi útþrá

eignast í vöggugjöf.

— Ljóðandi fer hann og finnur

í fjarskanum hafsins gröf.

Í dag er ég draumsins sonur.

Í dag er mér létt um spor.

— Í dag er ég frjáls úr fjötrum

og fagna þér — nýja vor.

— Frjálsbornar vermast og vaxa

vonir, sem hjarta mitt ól.

— Hraðfara svanir hugans

hefja sig — móti sól.

---