Sjómannadgsblað Vestmannaeyja 1978/ Höfn á suðurströndinni
Undanfarin ár hefur verið mikið umtal um hafnarmannvirki á suðurströnd Íslands. Hafa einkum komið til álita þrír staðir, þ.e. í Þykkvabæ, Dyrhólaós og í Vík í Mýrdal. Sérstök nefnd hefur verið starfandi í þessu máli til könnunar á væntanlegu hafnarstæði. Hafa staðhættir verið kannaðir víða, en endanlegt álit nefndarinnar liggur ekki fyrir enn þá.
Nýlega rakst ég á teikningu, sem gerð var í septembermánuði árið 1921, að hafnarmannvirkjum í Vík í Mýrdal. Hún er undirrituð af Thorvald Krabbe, þáverandi vitamálastjóra.
Hér er að sjálfsögðu ekki um lokaða höfn að ræða, nánast bryggju, þar sem skip á stærð við „Skaftfelling“ hefðu getað losað vörur og lestað og lítil fiskiskip hefðu getað lagt upp afla sinn.
Þessi fyrirhugaða bryggja er staðsett nokkru vestan við sjálfa Víkurbyggð, vestan við svonefndan Bás, og er þessi mynd birt hér til fróðleiks, ef hún prentast nógu vel.
