Eins og kemur fram annars staðar í þessu blaði var haldin sýning á skipslíkönum í Ásgarði sl. sjómannadag. Þar voru margir glæsigripir Tryggva Sigurðssonar. Hluti sýningarinnar sést hér á myndunum. Það má með ólíkindum telja hvað Tryggvi afkastar miklu þegar til þess er litið að hann stundar sjó allt árið á Frá.
Helgi Helgason var smíðaður í Vestmannaeyjum af Brynjólfi Einarssyni fyrir Helga Benediktsson. Hann var 189 tonn og þá stærsta skip sem smíðað hafði verið á Íslandi. Helgi Helgason var tilbúinn til síldveiða sumarið 1947.Á stokkunum hjá Tryggva er nú líkan af Sigurði VE 15. Hann var smíðaður í Bremenhaven í Þýskalandi 1960 og þá sem síðutogari fyrir Einar Sigurðsson (ríka) útgerðarmann. Síðar var hann gerður að nótaveiðiskipi. Þar næst var byggt yfir hann og enn síðar kom ný brú á skipið. Sigurður er eitt þekktasta aflaskip flotans, bæði sem síðutogari og nótaskip. Hann var í upphafi 1000 tonn.
