„Sjómannadagsblað Vestmannaeyja 1993/Nýr Herjólfur“: Munur á milli breytinga

Það var mikið um dýrðir í Eyjum mánudaginn 8. júní 1992 sem bar upp á annan dag hvítasunnu. Þann dag kom nýr Herjólfur til Eyja, þriðja skipið með þessu nafni sem þjónað hefur okkur Eyjabúum með ferðum milli lands og Eyja.<br>

Það var orðinn nokkuð langur aðdragandi að þessari komu. Upphafið að smíði þessa skips var að á aðalfundi [[Herjólfur|Herjólfs hf.]] fyrir árið 1982 hreyfði [[Guðmundur Karlsson]], síðar stjórnarformaður félagsins, þeirri hugmynd að fara að huga að nýsmíði. Það var þó ekki fyrr en 1985 að farið var að vinna að málinu af krafti. Þá var gerð athugun og samin skýrsla um þörfina. Á árunum 1986 og 1987 bárust stjórninni nokkrar hugmyndir og teikningar og fól stjórnin síðan dönsku verkfræðifyrirtæki, Dwinger Marine Consult A/S að hanna skip að þeim kröfum sem settar höfðu verið fram. Sérstaklega var hugað að öryggisþættinum, þ.e. tvær vélar o.s.frv.<br>

Í byrjun árs 1988 skilaði fyrirtækið svo lokahönnun á 79 metra löngu skipi sem uppfyllti þær kröfur sem fram höfðu verið settar. Síðar var verkið boðið út á alþjóðavettvangi og bárust mörg tilboð. Þegar til endanlegrar ákvörðunar kom samþykkti ríkisvaldið ekki smíði skips eftir þessari hönnun, en óskaði eftir að hannað yrði 68-70 metra skip. Var Skipatækni hf. í Reykjavík falið að aðlaga fyrri hönnun að þessum hugmyndum og hanna skip af þessari stærð. Hún var svo boðin út á alþjóðavettvangi vorið 1990 og bárust á milli 15 og 20 tilboð.<br>

Að vandlega athuguðu máli var tekið tilboði frá skipasmíðastöð í Noregi sem heitir SIMEK A/S og er í Flekkefjord. Hinn 16. apríl 1991 var svo skrifað undir smíðasamning við þetta fyrirtæki og hljóðaði samningurinn upp á um 1100 milljónir króna. Skipið átti að afhenda um mánaðamótin maí-júní 1992. Það er skemmst frá því að segja að smíði skipsins hófst mjög fljótlega og þrátt fyrir vantrú margra stóðust tímaáætlanir skipasmíðastöðvarinnar. Hinn 2. mars 1992 var skipið sjósett í Noregi.<br>

Stóra stundin rann svo upp í Flekkefjord í Noregi fimmtudaginn 4. júní 1992, en þá var skipið afhent hinum nýju eigendum og um leið var skipinu gefið nafn. Var það að sjálfsögðu Herjólfur.<br>

Þetta var hátíðleg stund og eftirminnileg. Lúðrasveit staðarins lék nokkur lög, ræður voru haldnar og jafnframt afhentu skólabörn í grunnskólanum í Flekkefjord skreytingu sem prýðir barnaleiksvæði um borð í skipinu. Þá var fáni skipasmíðastöðvarinnar dreginn niður og fáni skipafélagsins dreginn að húni og horfðu menn stoltir á.<br>

Laugardaginn 6. júní lagði svo skipið af stað frá Noregi áleiðis til Vestmannaeyja og þangað kom það eins og áður segir 8. júní 1992.<br>

Var athöfn hér á bryggjunni við komu skipsins. [[Lúðrasveit Vestmannaeyja]] lék, kór [[Landakirkja|Landakirkju]] söng, prestur blessaði farkostinn og haldnar voru nokkrar ræður. Að því loknu var skipið almenningi til sýnis og voru við það tækifæri góðgjörðir veittar í boði Herjólfs hf.<br>

Við komu skipsins var mikill mannfjöldi saman kominn á [[Básaskersbryggja|Básaskersbryggju]] til að hylla hinn nýja farkost. Svo mikill fjöldi skoðaði skipið þennan fyrsta dag að ekki verða hentar reiður á. En það var almannarómur að skipið væri hið glæsilegasta. Vandað og gott handbragð, en án íburðar.<br>

Það er skemmst frá því að segja að ferðin tókst með afbrigðum vel. Komu tugþúsundir manna um borð til að skoða það. Var þetta mikil og góð kynning, bæði fyrir skipið og fyrir Eyjarnar í heild.<br>

{{Sjómannadagsblað Vestmannaeyja}}