„Sjómannadagsblað Vestmannaeyja 1970/ Vetrarvertíðin 1970“: Munur á milli breytinga

VETRARVERTÍÐIN 1970 er ein af stórvertíðum á miðum hér við land. Var afli afburðagóður og meiri bolfisk- og loðnuafli en nokkru sinni fyrr á öllu svæðinu frá Hornafirði til Vestfjarða.<br>

Vertíðina einkenndi gott tíðarfar, jöfn og góð sókn og ágætis afli á línu og í net og mokafli af loðnu.<br>

Margir bátar drógu út strax 2. janúar, en fyrir Vestmannaeyjaflotann byrjaði árið giftusamlega, er [[Halkion VE 205]], sem hafði í rúman hálfan mánuð legið í strandi á Meðallandsfjöru, sigldi til hafnar á nýársdagsmorgun. Náðist báturinn út á gamlaárskvöld, en hann hafði í ofsaveðri rekið upp með bæði akkeri úti, eftir að hann fékk í skrúfuna þarna úti fyrir.<br>

Björg VE hafði fyrst báta lagt net á milli jóla og nýárs, en um miðjan janúar voru 5 bátar komnir á net, 15 voru á trolli, 9 á línu.<br>

Afli var strax góður, t. d. fékk Kópur viku af janúar 30 tn. í botnvörpu út af Skarðsfjöru, línubátar öfluðu vel, 8-9 tonn í róðri austur frá.<br>

Þó að mest af loðnunni færi í bræðslu, þá var nokkuð fryst til manneldis, og keyptu Japanir 1000 lestir af frystri loðnu, 50 til 80% loðnunnar til Japana verður að vera hrygna og þarf því að vanda vel til frystingar. Hér í Vestmannaeyjum voru fryst 402 tonn.<br>

Vegna beituvandræða var talsvert mikið magn af loðnu flutt jafnóðum með flugvélum til hafna í Faxaflóa og Breiðafirði og munu 15 til 20 tonn hafa verið flutt þannig.<br>

Bolfiskaflinn í mars var misjafn. Alltaf settu þó bátar öðru hverju í góðan róður og í lok mánaðarins voru 7 bátar komnir með yfir 500 tonna afla. Einn besti afladagur vertíðarinnar var 26. mars, sem var skírdagur. Ekki var sjóveður fyrr en seint á miðvikudaginn 25. marz, en á skírdag bárust um 1300 tonn á land. Þann dag tvísótti Hilmar á Sæbjörgu og fékk 95 tonn. Reyndar var þessi dagur mikill merkisdagur í sögu Vestmannaeyinga og annarra landsmanna, en þá voru 50 ár liðin frá því er fyrsta varðskip og björgunarskip Íslendinga — [[Þór]] -skip [[Björgunarfélag Vestmannaeyja|Björgunarfélags Vestmannaeyja]], kom til Eyja. Vestmannaeyjaflotinn hélt því vel upp á afmælið.<br>

Afli tregaðist þó afrur, var skárstur á Karganum; 20 tn. í róðri. Þegar vika var af apríl hófst svo „hrotan“, og var þá fiskur um allan sjó og afli almennt 20 til 30 tonn og allt að 50 tonn í róðri. Bátar voru mikið á svæðinu inn og vestur af Dröngum, á Ólafsvöllum, Trintunum og á Þjórsárhrauni. Einnig var ágætur afli á nærliggjandi heimamiðum við Ebenesarklakka, Drangahraunið og við Brekann. Fengu [[Emil M. Andersen|Emil Andersen]] á Júlíu og [[Guðjón Kristinsson (Miðhúsum)|Guðjón]] á Hrauney ágætan afla þarna.<br>

Eftir 1. maí var orðið mjög „lokalegt“ og bátar almennt að taka upp netin. Togbátar gerðu þó góða túra og Kópurinn endaði vertíðina með 40 tonna túr austur að Ingólfshöfða hinn 14. maí.<br>

Fiskur á vertíðinni var smár og lifrarlítill. Er hér vaxandi stofn á ferðinni, og spáir Jón Jónsson fiskifræðingur ekki lakari vertíð árið 1971.<br>

Hæstur þessara báta var Bára með 172 tonn og er formaður Bjarni Guðmundsson frá Háagarði. Oft var „fiskilegt“ að líta á fiskkasir þessara báta á gömlu bæjarbryggjunni í vetur og minnti þetta á liðna tíð. Nauðsynlegt væri að bæta aðstöðu bátanna með annarri bryggju og ef til vill góðri bómu með rafmagnsspili, svo að unnt væri að hífa beint á bíla upp úr bátunum.<br>

Ekki urðu sjóslys þessa vertíð, en í byrjun vertíðar féll aðkomusjómaður í höfnina og drukknaði. Hinn 17. mars slasaðist [[Gísli Eyjólfsson (yngri)|Gísli Eyjólfsson]] stýrimaður á Halkion á miðunum. Varð hann fyrir miklu höfuðhöggi, hrökk útbyrðis við erfiðar aðstæður og var nærri drukknaður.<br>

Togarar öfluðu vel þessa vertíð, var afli þeirra fjóra fyrstu mánuði ársins 28.000 lestir og skiptast landanir heima og erlendis jafnt.<br>

Hæsta löndunarhöfnin var Grindavík með 39.500 tonn, þaðan var einnig hæsti bátur yfir landið mb. Geirfugl (145 RT að stærð) með 1700 tonn og setti skipstjórinn, Björgvin Gunnarsson, nýtt aflamet, en aflamet Hilmars á Sæbjörgu í fyrra var 1665 tn.<br>

Veturinn var mildur og ekki teljandi hafís fyrir Norðurlandi.<br>

''Vertíðaraflinn og móttaka hans vertíðina 1970:''<br>

Bolfiskur frá áramótum til 15. maí: 39.000 tonn (rúml.) (vertíðina 1969: 31.500). Er þessi afli lúm 20% vertíðarafla landsmanna. Lifrarmagn á vertíðinni var 1744 tonn (1969: 1340), nýting lifrar 57%.<br>

Afli er allur óslægður með haus og slægðum afla breytt í óslægt með því að bæta 25% við aflann.<br>

Með trillum eru taldir þilfarsbátar að 12 rúmtonnum.<br>

[[Mynd:Vertíðin 1970 3 Sdbl. 1970.jpg|miðja|frameless]]

[[Mynd:Vertíðin 1970 4 Sdbl. 1970.jpg|miðja|frameless]]

[[Mynd:Vertíðin 1970 6 Sdbl. 1970.jpg|miðja|frameless]]