Hannes Gíslason (Grímshjalli)

Hannes Gíslason tómthúsmaður í Grímshjalli fæddist í september 1828, líklega í Kokkhúsi, og lést 4. ágúst 1900.
Foreldrar hans voru Gísli Andrésson tómthúsmaður í Kokkhúsi, síðar bóndi í Görðum við Kirkjubæ, f. 18. maí 1791, d. 23. desember 1855, og fyrsta kona hans, (11. júní 1820), Sigríður Guðmundsdóttir, f. 2. maí 1793, d. 30. október 1833.

Hannes var fósturbarn í Grímshjalli 1835 og 1840, 18 ára vinnumaður í Hólmfríðarhjalli 1845, 22 ára fyrirvinna hjá Hólmfríði Erlendsdóttur 1850, sjávarbóndi í Grímshjalli 1860 og 1870.
Við manntal 1880 og 1890 var Hannes vinnumaður í Juliushaab hjá Gísla Engilbertssyni. Hann lést 1900.
Hannes mun vera sá, sem kallaður var „sladdi“. Sjá nánar um hann í Bliki 1960: Gengið á reka eftir Árna Árnasonar.

Hannes var bróðir Margrétar Gísladóttur konu Samúels Bjarnasonar mormónaprests og hálfbróðir, (af sama föður), Þorgerðar Gísladóttur fyrri konu Sigurðar Sigurfinnssonar, foreldra Högna Sigurðssonar í Vatnsdal.

Kona Hannesar (skildu) var Guðríður Guðmundsdóttir húsfreyja, síðar vinnukona í Nýborg, f. 21. júní 1825, d. 10. febrúar 1891.
Börn þeirra hér:
1. Sigríður Hannesdóttir, f. 7. janúar 1854, d. 25 apríl 1854 „af barnaveikin“.
2. Sigríður Hannesdóttir, f. 27. júní 1855, d. 8. október 1855 „af nokkurskonar bjúg“.
3. Sigríður Hannesdóttir, f. 31. júlí 1856, d. 1. nóvember 1856 „af nokkurskonar bjúg“.
4. Andría Hannesdóttir húsfreyja í Kuðungi, f. 2. október 1857, d. 8. júlí 1900.
5. Þóranna Hannesdóttir, f. 3. febrúar 1859, d. 9. maí 1859 af „nokkurskonar bjúgi“.
6. Jóhanna Hannesdóttir vinnukona, f. 31. október 1862.
7. Guðmundína Hannesdóttir, f. 17. september 1864, d. 15. janúar 1865.

---

Heimildir

• Samantekt: Víglundur Þór Þorsteinsson.
• Blik 1960: Gengið á reka. Árni Árnason.
• Heimaslóð.is.
• Íslendingabók.is.
• Manntöl.
• Prestþjónustubækur.