„Blik 1967/Leiklistarsaga Vestmannaeyja 3. kafli, 1930-1950“: Munur á milli breytinga

Bræðurnir frá Litlabæ, Kristinn og Valdimar, máluðu leiktjöldin og nutu við það aðstoðar [[Guðmundur Guðmundsson (Uppsölum)|Guðmundar Guðmundssonar]] málarameistara frá Uppsölum. Til þess var tekið, hve baðstofan í Hlíð var vel gerð. <br>

Leikrit þetta var sýnt a.m.k. þrisvar sinnum í gamla Goodtemplarahúsinu á [[Mylnuhóll|Mylnuhól]] fyrir troðfullu húsi í öll skiptin og skemmtu áheyrendur sér konunglega.<br>

Leikárið 1935/36 var enn einu sinni sýnt leikritið „Ævintýri á gönguför“. Það hefir ávallt átt hér miklum vinsældum að fagna meðal leikhúsgesta og þótt margir kunni úr því langa kafla og alla söngva, hefir það engin áhrif um aðsókn. Viðtökurnar eru alltaf eins. Hitt varðar miklu, þegar með hlutverkin fara nýir starfskraftar. Fólk hefir áhuga á að sjá mismun túlkunar á hinum ýmsu persónum leikritsins, heyra söng þeirra, gleði og kæti á sviðinu og rifja upp „hina gömlu góðu daga“ frá frumárum þessa meistaraverks í höndum gömlu snillinganna, er á sviðinu kynntu okkur persónurnar þá á glæsilegan hátt.<br>

Ekki get ég sagt að ég persónulega hafi verið ánægður með afrek allra leikendanna í þetta skipti, en í heild fannst mér sýning þessi takast vel.<br>

Þetta eru aðeins hugdreifar um leikinn en gagnýni lítil.

Föstudaginn 9. okt. 1936 héldu sjálfstæðismenn hér allfjölmennan fund í Gúttó. Aðalefni fundarins var að stofna hlutafélag til að koma hér upp samkomuhúsi, sem væri samboðið kröfum tímans að öllum útbúnaði, bæði sem fundahús og almennra skemmtana. Þörfin fyrir slíkt hús var vitanlega mjög aðkallandi, þar eð ekkert sæmilegt hús var hér til fyrir almenn fundahöld. Undirtektir almennings voru góðar í þessu efni. Félagið var því stofnað og hlaut nafnið Samkomuhús Vestmannaeyja hf. Menn lofuðu á fundinum bæði framlagi í vinnu og peningum við væntanlega byggingu og urðu efndir þessa miklu meiri en nokkur hafði hugboð um. Safnaðist strax mikið fé og var hafizt handa um bygginguna eftir tvo daga eða 12. okt. 1936. Tvö félög í bænum lögðu rausnarlega af mörkum við þetta fyrirtæki, en það voru Kvenfélagið Líkn og Stúkan Bára nr. 2. Líkn lofaði allstórri upphæð, en Bára studdi bygginguna með því að selja hlutafélaginu hús sitt Gúttó og þar með lóðina undir hið nýja hús. Var það hin glæsilegasta byggingarlóð, sem til var í bænum. Vitanlega áttu svo þessi tvö félög að fá forréttindi í hinu nýja húsi.<br>