Blik 1936, 2. tbl. /Frá skólanum o.fl.

Efnisyfirlit 1936

Frá skólanum

Blik
Þakkar hinar ágætu aðsendu greinar. Höfundarnir hafa sýnt blaðinu þá velvild að rita þær fyrir það. — Vitað er að meðal Eyjabúa eru ekki allfáir menn, er hafa ýmislegt til brunns að bera, sem glæða má menningarlíf okkar hér og auka hróður Eyjanna út á við í þeim efnum. Þessir menn búa yfir mætti menntar eða þekkingar. Brýn nauðsyn er að fá hann leystan úr læðingi, svo að hann nái að vekja og glæða, skapa jarðveg fyrir aukið andlegt líf og meiri þroska.

Prófum
í gagnfræðaskólanum lauk 29. f.m. og fóru skólaslit fram daginn eftir með samdrykkju nemenda, kennara og nokkurra gesta.
Hæstu aðaleinkunnir í 2. bekk hlutu þær Björg Hjörleifsdóttir frá Engidal, 8,73 og Bera Þorsteinsdóttir frá Laufási, 8,59.
Í 1. bekk hlaut Sigurður E. Finnsson frá Borgarnesi 8,81, Friðrik Jörgensen frá Hvoltungu, 8,42, Sesselja Einarsdóttir frá London hér, 8,20 og Jóhann Vilmundarson frá Hlíð hér 8,17.
Nemendur tóku yfirleitt góð próf, höfðu stundað námið vel og tekið góðum framförum.
Drengirnir stunduðu kappsamlega úti íþróttir að vetrinum og fengu 5 þeirra verðlaun að lokum fyrir áhugann og leikni í þeim. Bezta eign hvers skóla eru góðir nemendur.

Vestmannaeyjum 3. maí 1936

Þ.Þ.V.

Sýning
á handavinnu og teikningum gagnfræðaskólanemendanna var haldin sunnudaginn 3. maí. Sýninguna sóttu um 600 manns, ungir og gamlir.
Aðsókn að sýningum gagnfræðaskólans fer vaxandi ár frá ári.

Við þökkum
Við ungmenni, sem göngum heil til leiks, megum þakka það lán og minnast þess, að sumir jafnaldrar okkar eiga ekki þeirri hamingju að fagna.
Það er því brýn skylda okkar að reyna, ef hægt er, að létta byrðar þeirra, sem bágt eiga í þessum efnum og sýna þeim velvild og hjálpsemi. Það göfgar okkur og glæðir okkar bestu tilfinningar.
Í vetur gengu nemendur gagnfræðaskólans út með söfnunarlista til handa Kristni Stefánssyni að Kalmanstjörn hér, með því markmiði að safna peningum fyrir farartæki handa honum. Bæjarbúar brugðust vel við eins og oftar, þegar til þeirra er leitað í svipuðum tilgangi, og hafa nú safnast um kr. 350,00. Við þökkum fólki hér þessar góðu undirtektir og hjálpsemi.
Verður nú undinn að því bráður bugur að útvega Kristni farartæki við hans hæfi.

Vestmannaeyjum 1. maí 1936f.h. nemenda gagnfræðaskólans Hermann Guðmundsson,—— Jóhann Vilmundarson,Sigurður E. Finnsson.

———————————————————————————————

Ábyrg ritstjórn: Stjórn Málf.félagsins

Eyjaprentsmiðjan h.f.