Björn H. Jónsson (skólastjóri)

Úr Heimaslóð, Sögusetri Vestmannaeyja
(Endurbeint frá Björn Hermann Jónsson)
Fara í flakk Fara í leit

Björn Hermann Jónsson fæddist 24. júní 1888 í Miðfirði og lést í Reykjavík 5. júni 1962, 73 ára að aldri. Foreldrar hans voru: Jón Jónsson bóndi á Núpsdal í Miðfirði, fæddur 29. janúar 1855, dáinn 28. maí 1955, og kona hans Ólöf Jónasdóttir frá Svarðbæli í Miðfirði, fædd 30. janúar 1862, dáin 29. júní 1943.

Björn ólst upp hjá foreldrum sínum þar til hann var 19 ára. Þá hvarf hann til náms í Flensborgarskólanum í Hafnarfirði þar sem hann lauk gagnfræðaprófi 1907. Árið 1909 fór Björn til Danmerkur til framhaldsnáms þar sem hann dvaldist í 5 ár. Björn Hermann kvæntist Jónínu G. Þórhallsdóttur 30. apríl 1915.Börn þeirra eru: Ólafur, fæddur 14. nóvember 1915, dáinn 19. janúar 1968. Svava, fædd 2. desember 1921, dáin 26. september 1965. Jón, fæddur 3. ágúst 1924, dáinn 7. maí 1971 og Haraldur fæddur 4. ágúst 1926, dáinn 31. júlí 1963.

Árið 1914 þurfti Steinn Sigurðsson skólastjóri í Vestmannaeyjum frá að hverfa. Björn Hermann var þá einn af þeim átta sem sóttu um stöðuna. Hlaut hann hana með atkvæðum allrar skólanefndarinnar. Björn var skólastjóri í Vestmannaeyjum í 6 ár. Hann var áhrifaríkur og ötull og áhugasamur hugsjónamaður.

Menntun

Gagnfræðapróf frá Flensborgarskóla í Hafnarfirði 1907. Stundaði nám í sögu, bókmenntasögu og bókfærslu við Napstjert í Danmörku samhliða skrifstofustörfum 1909 til 1911. Námskeið í garðyrkju í Brorup Husmandskole 1911. Nám í framhaldsdeild Frederiksborg Höjskole 1911 til 1912 og framhaldslýðskóla í Askov 1912 til 1914.

Starfsferill

Kennari við skóla í Vestur-Húnavatnssýslu veturna 1907 til 1909. Fór síðan til náms eins og að framan segir. Skólastjóri Barnaskóla Vestmannaeyja 1914 til 1920 og hélt jafnframt kvöldskóla fyrir unglinga alla veturna nema 1917 til 1918. 1920 til 1924 stóð hann fyrir alþýðuskóla í Hjarðarholti í Dölum, en flutti til Ísafjarðar 1924. Kennari og síðar skólastjóri við Barnakólann á Ísafirði árið 1930. Þá var Björn einnig skólastjóri iðnskólans á Ísafirði og gegndi fjölda trúnaðarstarfa fyrir Ísafjarðarsýslur. Hann lést 4. júní 1962.


Heimildir

  • Reynir Guðsteinsson. Kennaratal á Íslandi. Reykjavík. Prentsmiðjan Oddi hf. 1958-1988. Samtímamenn. Reykjavík. Vaka Helgafell hf. 1993 Íslendingabók.

Frekari umfjöllun

Björn Hermann Jónsson.

Björn Hermann Jónsson skólastjóri fæddist 24. júní 1888 í Núpsdalstungu í Miðfirði, V.-Hún. og lést 4. júní 1962.
Foreldrar hans voru Jón Jónsson bóndi á Torfastöðum í Miðfirði, f. 29. janúar 1855, d. 28. maí 1950, og kona hans Ólöf Jónsdóttir húsfreyja, f. 30. janúar 1862, d. 29. júní 1943.

Björn var með foreldrum sínum á Torfastöðum 1890 og 1901.
Hann varð gagnfræðingur í Flensborgarskóla 1907, stundaði nám í sögu, bókmenntasögu og bókfærslu í Napstjert í Danmörku , samhliða skrifstofustörfum 1909-1911, tók námskeið í garðyrkju í Brorup Husmandsskole 1911, stundaði nám í framhaldsdeild Frederiksborg Höjskole 1911-1912, í framhaldslýðháskóla í Askov 1912-1914.
Björn hóf húsasmíðanám 1906, fékk húsasmíðaréttindi, vann lengi við húsasmíðar að sumrinu.
Björn var kennari í Þorkelshólshreppi í V.-Hún. 1907-1908, Fremri-Torfustaðahreppi þar 1908-1909.
Hann var skólastjóri Barnaskólans í Eyjum 1914-1920, hélt þar jafnframt kvöldskóla fyrir unglinga alla veturna nema 1917-1918.
Björn hélt alþýðuskóla í Hjarðarholti í Dölum 1920-1924, var kennari í Barnaskólanum á Ísafirði 1924-1930, skólastjóri þar frá 1930-1957, skólastjóri Iðnskólans á Ísafirði 1928-1930 og og frá 1932-1957.
Björn sat í barnaverndarnefnd Ísafjarðar frá 1932-1957. Hann var í yfirskattanefnd Ísafjarðarsýslna og -kaupstaðar frá 1928-1957, var héraðssáttasemjari í vinnudeilum frá 1939-1957. Hann sat í milliþinganefnd í fræðslumálum 1934.
Björn var tvívegis formaður Iðnaðarmannafélags Ísafjarðar, var fulltrúi á norræna yrkisskólaþinginu í Reykjavík 1949, á norræna iðnþinginu 1952.
Ritstörf:
Viðarfræði, 1950.
Útgáfur:
Ferskeytlur og farmannaljóð (Jón H. Begmann), 1950.
Úrval úr vísum Teits Hartmanns, 1951.
Ritstjóri og útgefandi:
Vestfirðingur, 1952.
Greinar í blöð og tímarit.
Þýðing (ásamt Kristjáni Jónssyni frá Garðsstöðum): Booker T. Washington, ævisaga, 1943.
Þau Jónína giftu sig 1915, eignuðust fjögur börn. Þau bjuggu á Kirkjubóli 1915 og 1916, síðan í Skólahúsinu, fluttu að Hjarðarholti í Dalasýslu 1920, fluttu til Ísafjarðar 1924, í Garðahrepp (síðar Garðabær) 1957, bjuggu síðast í Ásgarði 6 þar.
Björn Hermann lést 1962 og Jónína 1985.

I. Kona Björns, (30. apríl 1915), var Jónína Guðríður Þórhallsdóttir húsfreyja, kennari, f. 29. janúar 1891, d. 8. júlí 1985.
Börn þeirra:
1. Ólafur Björnsson læknir, f. 14. nóvember 1915 á Kirkjubóli, d. 19. janúar 1968.
2. Svava Björnsdóttir sjúklingur, f. 2. desember 1921, d. 26. september 1965.
3. Jón Björnsson rafvirki í Bræðraparti í Vogum, Gull. og í Hafnarfirði, f. 3. ágúst 1924, d. 4. júní 1971.
4. Haraldur Björnsson verkamaður á Keflavíkurflugvelli og í Reykjavík, f. 4. ágúst 1926, d. 31. júlí 1963.


Heimildir


Þessi grein tilheyrir Æviskrám Eyjafólks eftir Víglund Þór Þorsteinsson.