Sundskálinn á Eiðinu

Árið 1911 kom til tals innan Ungmennafélags Vestmannaeyja að reisa sundskála fyrir sundnemendur í Vestmannaeyjum. Sama ár hóf Ungmennafélagið undir forystu Steins Sigurðssonar, skólastjóra, að safna fé til skálabyggingarinnar. Haldnar voru hlutaveltur ásamt því að félaginu áskotnaðist fé á annan hátt. Árið 1913 var skálinn fullgerður og tekinn í notkun þá um sumarið.

Skáldið Örn Arnarson samdi frægt gamankvæði um sundskálahugsjónina og þar er þessa þekktu vísu að finna:

Þeim vex nú ekki allt í augum, ungmennunum hér.

Þeir ætla að reisa sundskála, þar sem Heimaklettur er,

og leigja þar út sólskinið og selja hreinan sjó

á 60 aura pottinn hélt Steinn að væri nóg.