Óskar Matthíasson (Byggðarenda)
Óskar Matthíasson fæddist í Vestmannaeyjum 22. mars 1921 í Garðsauka og lést 21. desember 1992. Foreldrar hans voru hjónin Þórunn Sveinsdóttir og Matthías Gíslason á Byggðarenda. Óskar var giftur Þóru Sigurjónsdóttur og eignuðust þau 7 börn.
Óskar hóf sinn sjómannsferil þegar hann var 17 ára á Emmu með Ragnari Þorvaldssyni. Sagði Óskar eitt sinn að hann hefði verið rekinn í land eftir um hálfan mánuð fyrir sjóveiki og annan ræfildóm. Hann hélt sig þó ekki nema í eitt ár frá sjónum. Hann var háseti og vélstjóri á hinum ýmsu bátum fram til ársins 1944 þegar hann hóf formannsferil sinn. Árið 1944 byrjaði Óskar sem skipsstjóri á Glað, síðan Skuldinni og loks aftur með Glað. En 1946 keypti hann Nönnu, síðan Leó og Þórunni Sveinsdóttur.
Óskar var aflakóngur Vestmannaeyja árið 1965, 1966, 1969 og 1970.
Óskar Kárason samdi formannavísu um Óskar:
- Óskar Matta ýtinn mjög
- afla föng að kanna.
- Þó að hristi stormur stög,
- strauminn mylur Nanna.
Heimildir
- Óskar Kárason. Formannavísur. Vestmannaeyjum, 1950.
- Sjómannadagsblað Vestmannaeyja. 1965.
- Þórarinn Ingi Ólafsson. http://www.eyjar.is/ingiol