„Íþróttafélagið Þór“: Munur á milli breytinga

Mikil vakning var í æskulýðsmálum í byrjun annars áratugs 20. aldarinnar. [[Steinn Sigurðsson]] skólastjóri beitti sér fyrir hreyfingu unga fólksins. Hann kenndi sund, glímu og knattspyrnu. Þetta var í nafni [[Ungmennafélag Vestmannaeyja|Ungmennafélags Vestmannaeyja]]. Það starf dó þegar Steinn Sigurðsson flutti frá Eyjum. En áður hafði íþróttakennari komið frá Reykjavík og haldið námskeið fyrir unga fólkið. Þessi kennari, sem hét Guðmundur Sigurjónsson, beitti sér fyrir stofnun sérstaks íþróttafélags. Stofnfundur þessa nýja íþróttafélags var 9. september 1913 í [[Borg|Þinghúsinu]]. Stofnfélagar voru 13 og voru þar á meðal margir nafnkunnir menn í bæjarfélaginu. Markmið Þórs voru í upphafi að auka líkamlegan og andlegan mátt æskulýðs byggðarlagsins, bæði pilta og stúlkna.

8 árum eftir stofnun Þórs eða árið 1921, kom [[Knattspyrnufélagið Týr|Knattspyrnufélagið Týr]] til sögunnar. Segja má að þessi tvö félög hafi ekki getað verið hvort án annars, því félögin efldu hvort annað, skerptu keppnisviljann, brýndu fórnarviljann og juku félagsþroska félaga sinna. Sameiginlega réðust félögin í að endurbæta völlinn við Hástein um miðjan þriðja áratuginn, en í nokkur ár hafði ekkert verið gert í vallarmálum. Var völlurinn við [[Hásteinn|Hástein]] notaður til ársins 1937, er íþróttasvæðið inni við [[Botn]] var tekið í notkun.