Loftur Guðmundsson (kennari)

Loftur Guðmundsson fæddist 6. júní 1906 að Þúfukoti í Kjós og lést 29. ágúst 1978. Loftur dvaldist um 12 ára skeið við kennslustörf í Eyjum, kenndi við Barnaskólann frá 1933 til 1945.

Í Eyjum stundaði hann einnig ritstörf og samdi meðal annars leikritið Brimhljóð sem var eitt af hans þekktari leikritum. Af bókum eftir Loft má nefna Jónsmessunæturmartröð á fjallinu helga sem kom út 1957 og kvikmyndasöguna Síðasti bærinn í dalnum sem kom út 1950. Auk þess var Loftur afkastamikill þýðandi. Eyjamenn minnast Lofts þó kannski helst fyrir ljóð hans við lög Oddgeirs Kristjánssonar. Hann samdi meðal annars textann við Þjóðhátíðarlagið 1968, Svo björt og skær, og textann við Ship ohoj. Kona Lofts var Tala Klemenzdóttir úr Mýrdal og áttu þau synina Guðmund Marino, Indriða og Gunnar Heiðar.