Barnaskólinn í Vestmannaeyjum 1880-1930/Barnaskólinn/Gjörðabók/Gjörðabók fyrir skólanefndina í Vestmannaeyja skólahéraði 1909-1932 texti bls. 1-10

Gjörðabók fyrir skólanefndina í Vestmanneyjaskólahjeraði

Reglugjörð fyrir barnaskólann bls. 11 feld úr gildi með:

Reglugjörð fyrir sama skóla bls. 79:

Reglugjörð fyrir skólabókasafnið bls. 15

Reglugjörð fyrir Unglingaskólann bls. 200

Steinn Sigurðsson, sem hefir tekið aðalpróf af Alþýðu-og gagnfræðaskólanum í Flensborg og leyst af hendi kennarapróf við sama skóla og einnig sótt 2. námsskeið kennara við kennaraskólann í Reykjavík, er hjermeð ráðinn aðalkennari við barnaskólann í Vestmanneyjaskólahjeraði af hlutaðeigandi skólanefnd. Kennslutími skal vera 6 mánuðir á skólaárinu, og laun 100 - eitt hundrað krónur um mánuðinn. Hvorugur samningsaðila getur sagt samningnum upp eftir 31. maí ár hvert nema með beggja samþykki.

Vestmannaeyjum 30. júlí 1909.

Í skólanefnd Vestmannaeyjahrepps.

Að jeg sje ofanskrifuðum samningi samþykkur votta jeg með undirskrift minni.

Sólheimum 30. júlí 1909.

Ágúst Árnason, sem tekið hefir aðalpróf af alþýðu- og gagnfræðaskólanum í Flensborg, er hjermeð ráðinn annar kennari við barnaskólann í Vestmannaeyja skólahjeraði af hlutaðeigandi skólanefnd. Kennslutími skal vera 6 mánuðir á skólaárinu, og laun kr. 75.00 (sjötíu og fimm krónur) um mánuðinn. Hvorugur samningsaðila getur sagt samningum upp eftir 31. maí ár hvert nema með beggja samþykki.

Vestmannaeyjum 30. júlí 1909.

Í skólanefnd Vestmannaeyja

Að jeg sje ofanskrifuðum samningi samþykkur votta jeg með undirskrift minni.

Baldurshaga 30. júlí 1909.

Sigurjón Högnason, sem hefir tekið aðalpróf af Alþýðu- og gagnfræðaskólanum í Flensborg og sótt 2. námskeið kennara við kennaraskólann í Reykjavík, er hjermeð ráðinn 3. kennari við barnaskólann í Vestmannaeyjaskólahjeraði af hlutaðeigandi skólanefnd. Kennslutími skal vera 6 mánuðir á skólaárinu, og laun 400 ( fjögur hundruð) krónur alls. Hvorugur samningsaðila getur sagt samningnum upp eftir 31. maí ár hvert nema með beggja samþykki.

                                            Vestmannaeyjum. 30. júlí 1909.
                                             Í skólanefnd Vestmannaeyja

Að jeg sje ofanskrifuðum samningi samþykkur votta jeg með undirskrift minni.

                                               Baldurshaga 30. júlí 1909.
                                           

Eiríkur Hjálmarsson, sjálfmenntaður maður með margra ára kennarareynslu, er hjermeð ráðinn fjórði kennari við barnaskólann í Vestmannaeyjaskólahjeraði af hlutaðeigandi skólanefnd. Kennslutími skal vera 6 mánuðir á skólaárinu, og laun 350 (þrjú hundruð og fimmtíu) krónur alls. Hvorugur samningsaðila getur sagt samningum upp eftir 31. maí ár hvert, nema með beggja samþykki.

                           Vestmannaeyjum 30. júlí 1909
                             Í skólanefnd Vestmannaeyja

Að jeg sje ofanskrifuðum samningi samþykkur votta jeg með undirskrift minni.

                              Vegamótum 30. júlí 1909.

Ár 1908, laugardaginn 20. júní átti skólanefndin í Vestmannaeyja skólahjeraði fund með sjer. Allir hinir nýkosnu skólanefndarmenn mættu á fundinum. Var þá tekið fyrir

1. Kosnir embættismenn nefndarinnar og fjell kosningin þannig að formaður var kosinn sýslumaður Magnús Jónsson, og skrifari verzlunarmaður Árni Filippusson. 2. Lesnar voru upp umsóknir um kennarastörf við skóla hjeraðsins frá Steini Sigurðssyni fyrverandi yfirkennara skólans, Oddgeiri presti Guðmundsen, Eiríki Hjálmarssyni á Vegamótum, Ágústi Árnasyni í Baldurshaga og Sigurjóni Högnasyni í Baldurshaga. Nefndin ályktaði að veita Steini Sigurðssyni yfirkennarastöðuna með 600 króna launum, Ágústi Árnasyni stöð 1. undirkennara með 450 kr. launum, og Sigurjóni Högnasyni stöðu 2. undirkennara með 400 króna launum, öllum um óákveðinn tíma með þeim uppsagnarfresti að hálfu skólanefndar eða hlutaðeigandi kennara sem á sinum tíma verður ákveðinn í reglugjörð skólans. 3. Lagt var fram frumvarp til reglugjörðar fyrir skólann, samið af kennara Steini Sigurðssyni. Nefndin komst að þeirri niðurstöðu að áður en reglugjörð yrði samþykkt væri nauðsynlegt að nefndarmenn kynntu sjer vel frumvarp þetta og var í því skyni afráðið að það gengi meðal þeirra til yfirvegunar. Þar af leiðandi var því málefni frestað til næsta fundar. Ennfremur var lagt fram frumvarp til reglugjörðar fyrir skólabókasafn, samið af sama manni. Um það voru gjörðar sömu ályktanir og fyrgreint frumvarp. 4. Til umræðu kom hvort ekki beri nauðsyn til að leiksvæði væri ætlað skólanum. Til að undirbúa það málefni voru kosnir Sigurður Sigurfinnsson, Steinn Sigurðsson og Ágúst Árnason.

                                                       Fleira fjell ekki fyrir.  Fundi slitið.

                                                Magnús Jónsson              Árni Filippusson

                                     Ágúst Árnason  Sigurður Sigurfinnsson   St. Sigurðss
                                                                        

Ár 1908, þriðjudaginn 1. september, átti skólanefndin fund með sjer í skólahúsinu.

4 nefndarmenn mættu á fundinn en hinn 5. þeirra formaður nefndarinnar var fjarverandi.  Formaður (til bráðabirgða) kosinn Árni Filippusson.   
  Á fundinum var tekið fyrir.
   Með því að húsrúm skólans, sem að undanförnu hefir verið nóg, er nú, vegna aukinna tölu barna á skólaskyldu aldri, orðið of lítið, afrjeð skólanefndin að hlutast til um, að þau börn sem eru umfram þau er húsrúm er fyrir, nytu fræðslu daglega eptir að kennsla þeirra barna, sem skólahúsið rúmar í einu hefir fari fram.  Sú kennsludeild sem þannig myndast ætlast nefndin til að starfaði eptir kl. ?  daglega og verði notuð af þeim börnum sem eptir kunnáttu að dæma,  minnstar tilsagnar hafa notið í heimahúsum til undirbúnings undir aðalskólann, og kennslan kostuð sumpart af aðstandendum barnanna, eptir samkomulagi við þá, sumpart af almanna-fje.  En ályktun um launaupphæð væntanlegs kennara við þessa fyrirhuguðu kennsludeild var frestað þar til nokkurn veginn verður sjeð hve fjölsótt hún verður og samið verður við kennara hennar.

Sigurði Sigurfinnssyni var falið að útvega 3 skólaborð með bekkjum til viðbótar við þau, sem að undanförnu hafa verið notuð. Steini Sigurðssyni var falið að ráða hæfan mann til að kenna skólabörnunum söng eina klukkustund í hverri viku næst komandi skólatíma. Tímatafla fyrir 3 bekki skólans um skólatímann1908/9 var lögð fram, samþykkt og undirskrifuð af öllum viðstöddum skólanefndarmönnum.

Fleira fjell ekki fyrir. Fundi slitið.

Árni Filippusson Ágúst Árnason St. Sigurðsson Sigurður Sigurfinnsson

Ár 1908, miðvikudaginn hinn 1. september, átti skólanefndin fund með sjer í skólahúsinu. Formaður nefndarinnar var fjarverandi, en hinir nefndarmennirnir mættu allir (4)

Á fundinum var haldið áfram yfirvegunum seinasta fundar um fræðslu þeirra barna skólahjeraðsins sem skólahúsrúm skortir, og þá gjörðar þessar ályktanir:

1. Þangað til öðruvísi verður ákveðið af skólanefnd hjeraðsins skiftist 1. bekkur skólans í 2 deildir og nefndist önnur þeirra a-deild, hin b-deild. Kennari sje ráðinn sérstakur fyrir þá deild. 2. Í a-deild bekkjarins njóta kennslu þau börn í skólahjeraðinu, 8 til 10 ára að aldri, sem æskt er kennslu fyrir, og ekki eru nokkurn veginn læs og skrifandi, og einnig önnur börn á sama námsstigi, þó eldri sjeu en 10 ára, ef þau álítast ekki óhæf til náms. 3. Með því að ekki er lagaskylda að veita börnum á þessu aldurs-og námsstigi ókeypis kennslu, var með samþykki húsbænda flestra þeirra barna, sem ætlast er til að fyrst um sinn njóti kennslu í a-deild 1. bekkjar , ákveðið að kaup fyrir kennslu í henni skuli vera 12 krónur um skóla árið fyrir hvert barn, og greiðist það kennslukaup af þeim, sem barnið hefir til framfærslu. 4. Ákveðið var að halda uppi kennslu í deildinni í 6 mánuði, 3 stundir á dag, og að hún færi fram að lokinni daglegri kennslu í b-deild bekkjarins og 2. og 3. bekk, og eftir reglugjörð skólans og tímatöflu samþykktri af skólanefndinni. 5. Í laun um skólaárið 1908/9 var ákveðið að veita kennara deildarinnar umfram þær 12 krónur, sem greiðast fyrir hvern nemandi hennar 132 krónur af sveitarsjóði, auk ókeypis húsnæðis fyrir deildina í skólahúsinu, ljóss og hita. 6. Kennari deildarinnar var ráðinn Eiríkur Hjálmarsson á Vegamótum þeim skilyrðum sem hjer skráðar greinar gefa tilefni til, að því viðbættu að nemendur deildarinnar yrðu ekki fleiri en 15, nema því aðeins að kennarinn aflaði sjer á eigin kostnað aðstoðar við kennsluna; þá væri honum heimilt að hafa í deildinni allt að 20 nemendur gegn ákveðinni borgun ( 12 kr. ) frá þeirra hálfu, án þess að tillagi frá sveitaersjóði breyttist vegna breyttrar tölu nemenda. 7. 8. Fleira fjell ekki fyrir. Fundi slitið. Árni Filippusson Sigurður Sigurfinnsson Ágúst Árnason St. Sigurðsson

Ár 1908 mánudaginn 21. september átti skólanefndin fund með sjer á heimili formanns hennar. Allir nefndarmenn á fundi. Á fundinum var tekið fyrir: 1. Samin var reglugjörð fyrir skólann með hliðsjón af fyrirmynd frá yfirstjórn fræðslumála (Reglugjörð) Formaður nefndarinnar tók að sjer að senda reglugjörðina stjórnarráðinu til staðfestingar. 2. Frumvarp það til reglugjörðar fyrir skólabókasafn Vestmannaeyja sem fram var lagt á fundi nefndarinnar 20. júní næstl. Var samþykkt með lítilsháttar breytingum, og verður reglugjörðin færð inn í gjörðabókina. 3. Til að fullnægja eptirliti því er 5. gr í erindisbrjefi skólanefnda fyrirskipar, um eptirlit með fræðslu barna á aldrinum 7 til 10 ára, var ákveðið að prófuð skyldu öll börn á þeim aldri af skólanefndarmönnunum Ágúst Árnasyni og Steini Sigurðssyni um næstu mánaðarmót að undangenginni auglýsingu skólanefndarinnar þaraðlútandi. Aðstandendur barnanna skulu kvaddir til prófsins. 4. Til að hafa umsjón með skólahúsinu og ræstingu á því var kosinn Sigurfinnur Sigurfinnsson.

Fleira fjell ekki fyrir. Fundi slitið.

Magnús Jónsson Árni Filippusson Ágúst Árnason Sigurður Sigurfinnsson St. Sigurðsson

Ár 1908 föstudaginn 23. október átti skólanefndin fund með sjer á heimili formanns hennar. Allir nefndarmenn á fundi.

Á fundinum var tekið fyrir:

1. Skólakennarar þeir, sem á fundi skólanefndarinnar 21. f.m. voru kosnir til að prófa börn þau í skólahjeraðinu, sem eru á aldrinum 7 til 10 ára, skýrðu frá því að auglýsing þar að lútandi hefði ekki verið send. Var því ákveðið að gjöra ítarlegri tilraun í þessu efni með því að kalla viðkomendur til prófs, og verði það árangurslaust þá að ganga á heimilin til að kynna sjer kunnáttu barnanna og áminna húsbændur þeirra ef þess er þörf. 2. Lagt var fram brjef frá umsjónarmanni fræðslumála, með því er skýrt frá því að stjórnarráðið hafi úthlutað barnaskólanum 430 kr. af styrktarfje til barnaskóla árið 1907. 3. Lesið var upp brjef frá Brynjólfi organleikara Sigfússyni þess efnis að hann taki að sjer söngkennslu í skólanum en sú kennsla gæti ekki byrjað fyr en í desembermánuði, vegna þess að hljóðfæri til notkunar við kennsluna væri ekki fáanlegt fyr en þá. Ákveðið var að reyna að útvega hljóðfæri að láni til þess tíma og þannig stuðla að því að kennslan geti byrjað sem fyrst. 4. Lagt var fram brjef frá Halldóri hjeraðslækni Gunnlaugssyni, þar sem hann býðst til að kenna leikfimi í skólanum á komandi vetri án endurgjalds, og ennfremur brjef frá barnakennara Sigurjóni Högnasyni, þar sem hann býðst til að nota framboðna kennslu Halldórs læknis og æfa sig í leikfimi, sem hann að nokkru leyti hefir numið, í því skyni að geta haldið fram eftirleiðis kennslu í þessari grein. Skólanefndin tók þessu boði fengisamlega, og ætlast nefndin til að kennslan geti farið fram í þinghúsinu að fengnu leyfi hreppsnefndarinnar til þess.

Fleira fjell ekki fyrir. Fundi slitið.

Magnús Jónsson St. Sigurðsson Árni Filippusson Ágúst Árnason Sigurður Sigurfinnsson

Ár 1909, sunnudaginn 31. janúar, átti skólanefndin fund með sjer á heimili formanns hennar. Allir nefndarmenn mættu á fundinn.

   Fram voru lagðar skriflegar beiðnir frá 5 aðstandendum skólabarna um að börn þeirra yrði leyst frá skólanámi frá byrjun febrúarmánaðar til loka yfirstandandi skólatíma.  Ástæða til þessara beiðna voru annir á viðkomandi heimilum á vetrarvertíðinni.  Eftir nokkrar umræður komst nefndin að þeirri  niðurstöðu að hvorki lögin um fræðslu barna nje reglugjörð skólans heimiliðu undanþágu þá, sem farið er fram á, þar sem hjer væri ekki um neinar sjerstakar ástæður að ræða, heldur svo almennar ástæður að þær næðu til flestra þeirra er börn eiga á skólanum.  Þar af leiðir að slíkar undanþágur gætu valdið losi á skólahaldinu í heild sinni.  Ákvað svo nefndin að veita ekki þá eptir æsktu undanþágu.

Fleira kom ekki til umræðu. Fundi slitið.

Magnús Jónsson Árni Filippusson Ágúst Árnason St. Sigurðsson.

• Efnisyfirlit: Barnaskólinn í Vestmannaeyjum 1880-1930