Freymóður Þorsteinsson

Freymóður og Ragnheiður árið 1971.

Freymóður Þorsteinsson var bæjarfógeti Vestmannaeyja frá 1963 til 1973. Hann fæddist þann 13. nóvember 1903 á Höfða í Þverárhlíð. Hann lést 15. mars 1998. Foreldrar hans voru Þorsteinn Jónsson bóndi, bónda á Úlfsstöðum í Hálsasveit og Sigríður Jónsdóttir í Hringsdal í Grýtubakkahreppi.

Freymóður varð stúdent í Reykjavík 1926 og síðar cand. juris frá Háskóla Íslands 1932.

Hann var ráðinn sem fulltrúi hjá Eggert Claessen hrl. 1932 til 1937 og stundaði síðan lögfræðistörf í Reykjavík og víðar og var m.a. settur sýslumaður í Múlasýslu fyrri hluta árs 1939 þegar sýslumaður þar sat á þingi. Freymóður var fulltrúi hjá bæjarfógetanum í Vestmannaeyjum frá 1942 til 1963 þar til hann var skipaður bæjarfógeti þar. Hann sóttist eftir lausn frá störfum frá 1. desember 1973. Hann var einnig varaformaður yfirkjörstjórnar í Suðurlandskjördæmi 1963 til 1973.

Kona hans var Ragnheiður Henrietta Elisabet Hansen dóttir Jörgen Hansen skrifstofustjóra í Reykjavík. Lengst af var Freymóður ókvæntur, en á árinu 1968 kvæntist hann Ragnheiði sem hann hafði kynnst á sínum yngri árum. Bjó Ragnheiður þeim fallegt heimili í embættisbústaðnum Tindastóli. Stjúpdóttir Freymóðs er María Guðmundsdóttir.

---

Heimildir

• Guðlaugur Gíslason: Eyjar gegnum aldirnar. Frásagnir af mannlífi og atburðum í Vestmannaeyjum frá gamalli tíð og nýrri. Reykjavík, 1982.
• Minningargreinar í Morgunblaðinu, 24. mars 1998.