Óskar Lárusson (útgerðarmaður)
Óskar Ástvaldur Lárusson útgerðarmaður og umboðsmaður, fæddist 13. des. 1911 í Bjarnaborg í Norðfirði og lézt 29. maí 2002.
Foreldrar hans voru Lárus útvegsbóndi og sjómaður í Sjávarborg í Neskaupstað, f. 9. sept. 1886 á Karlsstöðum í Vöðlavík, S. Múl., d. 15. sept. 1974, Ásmundar bónda í Vöðlavík, Jónssonar og konu Ásmundar, Þórunnar Halldórsdóttur. Móðir Óskars Ástvaldar og kona Lárusar (27. nóv. 1910) var Dagbjört húsmóðir, f. 16. apríl 1885 á Krossi í Mjóafirði eystri, d. 6. sept. 1977, Sigurðar bónda á Krossi Þorsteinssonar, Hinrikssonar og konu Sigurðar, Solveigar húsfreyju á Krossi, Gísladóttur, Eyjólfssonar.
Óskar var með foreldrum sínum í æsku.
Hann hóf snemma sjómennsku, í fyrstu með föður sínum á árabát, síðar á trillu. Hann varð snemma útgerðarmaður og síðasta skip hans var togskipið Hafþór NK 76.
Óskar var meðlimur í Samvinnufélagi útgerðarmanna í Neskaupstað (SÚN) og var í varastjórn og stjórn þess í 33 ár.
Hann hafði umsjón og framkvæmd með byggingu hraðfrystihúss SÚN og sá einnig um kaup á vélum þess og tækjum. Óskar var einn af stofnendum Olíusamlags útvegsmanna á Norðfirði 1947 og var stjórnarformaður þess frá stofnun þar til hann flutti Suður og var einnig starfsmaður þess í mörg ár. Hann hafði forgöngu að stofnun síldarsöltunarstöðvarinnar Drífu hf. í Neskaupstað og var framkvæmdastjóri fyrirtækisins meðan það starfaði. Hann var umboðsmaður síldarútvegsnefndar í Neskaupstað í 15 ár. Árið 1970 varð Óskar heilbrigðisfulltrúi fyrir Neskaupstað og var einnig trúnaðarmaður Verðlagseftirlitsins þar í nokkur ár. Eftir að hann flutti Suður starfaði hann sem sölumaður hjá Nóa-Síríusi hf. í tíu ár og lauk störfum þar árið 1986, þá 75 ára gamall.
Þau Sigríður giftu sig 1933 í Eyjum, eignuðust þrjú börn. Þau bjuggu í Eyjum í 3 ár, í Neskaupstað í nær 40 ár, síðan í Mosfellssveit, en að síðustu í Reykjavík.
Óskar lést 2002 og Sigríður 2004.
I. Kona Óskars Ástvaldar, (14. apríl 1933 í Eyjum), var Sigríður Árnadóttir frá Burstafelli, húsfreyja, f. 19. september 1910 á Stuðlum í Norðfirði, d. 13. apríl 2004.
Börn þeirra:
1. Árndís Lára, f. 4. ágúst 1933, búsett í Reykjavík Maður hennar Friðrik Jón Sigurðsson.
2. Óskar Sigurður, f. 8. júní 1941 í Neskaupstað, búsettur í Noregi. Kona hans Kirsti Helene Óskarsson, f. Guttormsen.
3. Ólafur, f. 21. marz 1946 í Neskaupstað, sölumaður, sölustjóri, búsettur í Mosfellsbæ, d. 13. apríl 2023. Kona hans Fanney Valgarðsdóttir.
Myndir
Heimildir
- Samantekt: Víglundur Þór Þorsteinsson.
- Einar Jónsson. Ættir Austfirðinga. Reykjavík: Austfirðingafélagið í Reykjavík, 1953-1968.
- Manntöl.
- Morgunblaðið 6. júní 2002. Minning.
- Niðjatal Sigurbjargar Sigurðardóttur, Burstafelli, Vestmannaeyjum.
- Pretstþjónustubækur.
Þessi grein tilheyrir Æviskrám Eyjafólks eftir Víglund Þór Þorsteinsson.