Blik 1980/Íslandsmeistararnir í knattspyrnu 1979 (mynd)

Vissulega vakti það athygli manna um land allt, er knattspyrnulið Íþróttabandalags Vestmannaeyja (Í.B.V.) varð Íslandsmeistari á fyrra ári. Það hafði ekki áður gerzt í sögu bandalagsins.
Hér á Blik því láni að fagna að birta mynd af þessu sigursæla og knáa knattspyrnuliði, og svo aðstoðarmönnum og gesti.

Í fyrsta skipti í sögu Íslenskrar Knattspyrnu var Íslandsmeistarabikarinn fluttur út fyrir Faxaflóasvæðið. V/s Herjólfur flutti hann til Vestmannaeyja ásamt klappliði Eyjamanna. Þegar Herjólfur lagði að, var á Básaskersbryggjunni í Eyjum bíll við bíl og nokkrar þúsundir Eyjamanna til að fagna sigurvegurunum. Á bryggjunni lék Lúðrasveit Vestmannaeyja og Kór Landakirkju söng þjóðsöng Eyjamanna, Yndislega eyjan mín, eftir Sigurbjörn Sveinsson, rithöfund. Þá flutti Sveinn Tómasson, forseti bæjarstjórnar, ræðu og bauð Íslandsmeistarana velkomna heim. Þeim bárust blómvendir, peningagjafir o.fl. Eitt dagblaðanna komst þannig að orði að hinar ungu og glæsilegu eiginkonur og unnustur liðsmannanna hefðu mætt þeim um borð fagnandi.
Að lokinni skemmtilegri athöfn á bryggjunni, var gengið í veitingahúsið Gestgjafann og notið þar veizlufagnaðar í boði eigendanna, hjónanna Pálma Lórentssonar og konu hans, Marýar Sigurjónsdóttur

Aftari röð frá vinstri: Einar Hallgrímsson, fararstjóri, Jóhann Ólafsson, knattspyrnuráðsmaður, Árni Johnsen, blaðamaður (gestur), Viktor Helgason, þjálfari hins sigursæla liðs, Ómar Jóhannsson, Gústaf Baldvinsson, Friðfinnur Finnbogason, Valþór Sigurþórsson, Páll Pálmason, Snorri Rútsson, Kjartan Másson, aðstoðarþjálfari og Guðmundur Þ.B. Ólafsson, knattspyrnuráðsmaður.
Fremri röð: Tómas Pálsson, Viðar Elíasson, Jóhann Georgsson, Ársæll Sveinsson, markvörður liðsins, Sveinn Sveinsson, Þórður Hallgrímsson, fyrirliði, Guðmundur Erlingsson, Óskar Valtýsson, Örn Óskarsson og Kári Þorleifsson

Heilladísir (eiginkonur og unnustur) íþróttakappa 1.deildar Í.B.V. 1979.
Þær sem þekkjast frá vinstri:
Stefanía Þorsteinsdóttir, Hulda Kærnested, Inga Jónsdóttir, Jenný Jóhannsdóttir, Jóhanna Þórðardóttir, Sigfríð Sigurðardóttir, Guðrún Guðjónsdóttir, Agnes Einarsdóttir, Elín Lárusdóttir og Ragna Björgvinsdóttir.
Árni Johnsen er lengst til hægri á myndinni og stjórnar lofsöng heilladísanna.